«Ես քաղաքակիրթ մրցապայքարի կողմնակից եմ». Հովհաննես Վարդանյանը կառաջադրվի ռեյտինգային ընտրակարգով

Արաբկիր վարչական շրջանի ղեկավար Հովհաննես Վարդանյանը Դաշնակցության թեկնածուներից մեկը կլինի Արաբկիր, Աջափնյակ, Դավիթաշեն շրջաններն ընդգրկող թիվ 2 ընտրատարածքում: Ռեյտինգային ընտրակարգով առաջադրվելու որոշման մասին Վարդանյանը զրուցեց Yerkir.am-ի հետ: Նա նախ նշեց, որ ՀՅԴ-ից առաջարկություն ստանալուց հետո երկար է մտորել եւ եկել եզրահանգման, որ իրեն տեսնում է օրենսդիրում:

«Աշխատելու դաշտ եմ տեսել, դրա համար էլ ընդունել եմ ինձ արված առաջարկությունը»,- ասաց Վարդանյանը եւ հիշեցրեց, որ, նախքան վարչական շրջանի ղեկավար դառնալը, երկար տարիներ աշխատել է իրավապահ համակարգում, մեծ փորձ ունի:

Դիտարկմանը, թե լուրջ պայքար է սպասվում, ՀՀԿ-ն առաջադրելու է պատգամավորներ Արթուր Գեւորգյանի եւ Արտակ Սարգսյանի /ՍԱՍ-ի Արտակ/, Արման Սահակյանի, Արման Բաբլոյանի թեկնածությունները, և հարցին`ինչպե՞ս է պայքարելու ուժի եւ փողի դեմ, Վարդանյանը պատասխանեց, որ կոռեկտ չի համարում որակումներ տալ իր մրցակիցներին, հետո էլ հավելեց, որ մարդկային նորմալ հարաբերություններ ունի բոլոր թեկնածուների հետ:

«Պետք չէ թշնամաբար մոտենալ հարցին: Ես քաղաքակիրթ մրցապայքարի կողմնակից եմ: Ես արաբկիրցի եմ, ապրել եւ ապրելու եմ այստեղ, իմ զավակներն այստեղ են ապրելու: Ես չեմ արել մի բան, ինչի համար իմ երեխաները կարող են ամաչել: Իմ` թաղապետ եղած ժամանակ էլ փորձել եմ կարճ ժամանակում, հնարավորության չափով անել այն ամենը, ինչ ինձանից պահանջվում է»,- ասաց նա:

Հարցին` այդուհանդերձ, փողն ու ուժն իրենցը կանեն, ո՞րն է իր հաղթաթուղթը, Վարդանյանը պատասխանեց. «Իմ աշխատանքը, մարդիկ, ովքեր ինձ ճանաչում են: Ես իմ ընտրողի կողքին եմ լինելու, իրենք էլ` իմ: Ընտրողը պետք է ըստ թեկնածուի աշխատանքի գնահատի: Ես դեռ ծրագրեր ունեմ, որոնք պետք է կյանքի կոչեմ: Ի վերջո, մարդիկ կհասկանան, որ գումարով չի կարելի վաճառել վաղվա օրը »: