Ընտրություններին կգնանք առանց «Ելք»-ի գործընկերների. Նիկոլ Փաշինյան

ՀՀ վարչապետի պաշտոնակատար Նիկոլ Փաշինյանը Հյուսիսային պողոտայում շրջում է սիրիահայերի ցուցահանդես-տոնավաճառում:

Պատասխանելով «Ազատություն» ռադիոկայանի հարցերին և անդրադառնալով վարչապետի թեկնածու առաջադրվելու, բայց չընտրվելու տարբերակին, նա նշեց, որ դա քաղաքական հարց չէ, իրավական հարց է:

«Իրավաբանների բանավեճեր են տեղի ունենում: Ճիշտն ասած՝ օրվա երկրորդ կեսի քննարկումների արդյունքում ավելի ծանրակշիռ էր այն կարծիքը, որ ընդհանրապես այդպիսի մեկնաբանությունը ճիշտ չէ՝ կապված առաջադրման անհրաժեշտության հետ: Մեկնաբանություններ կան, որ, եթե անգամ առաջադրվի, հնարավոր է՝ պատգամավորները չներկայանան, և քվորում չլինի»,- ասաց նա:

Փաշինյանն ընդգծեց, որ ՔՊ-ն ԱԺ արտահերթ ընտրություններին առանձին է մասնակցելու: «Կամ էլ եթե դաշինքով, ապա` «Իմ քայլը» դաշինքի ֆորմատով: Մեծ հավանականությամբ այդպես էլ տեղի կունենա, բայց քանի որ դեռ վերջնական որոշում չի կայացվել, չնայած դեռ քաղաքապետի ընտրությունների ժամանակ էր կարծես որոշում կայացվել, որ պետք է «Իմ քայլը» դաշինք լինի»,-ընդգծեց Փաշինյանը:

Հարցին, թե «Ելք»-ի իրենց գործընկերները կլինե՞ն դաշինքում, վարչապետի պաշտոնակատարը պատասխանեց. «Չեմ կարծում, որովհետև ասացի, որ Երևանի ավագանու ընտրությունների ֆորմատով ենք գնալու»: