«Ելք»-ում միշտ կան տարաձայնություններ, եղել են ու կլինեն հակասություններ. Նիկոլ Փաշինյան

ԱԺ «Ելք» խմբակցության ղեկավար Նիկոլ Փաշինյանը խորհրդարանում լրագրողների հետ զրույցում հայտարարեց, որ «Ելք» դաշինքում քննարկումները շարունակվում են, և հույս կա, որ դաշինքում կլինի կոնսենսուս, ու իրենք շատ կոնկրետ գործողություններով կանեն այն, ինչ պարտադիր է: Նշենք, որ քննարկումները վերաբերում են այն հարցին, թե ինչպես պայքարել, որպեսզի Սերժ Սարգսյանը չդառնա վարչապետ: Այս հարցով «Ելք»-ում տարաձայնություններ կան:

Հարցին` եթե դաշինքում համաձայնություն չկար, ինչո՞ւ ինքը որոշեց գնալ Ազատության հրապարակ, Փաշինյանը պատասխանեց. «Գրված էր, որ քննարկել եմ ընտանիքիս հետ, նրանք պատրաստ են ինձ նորից գործուղել Ազատության հրապարակ: Դա չի նշանակում, որ ինձ տանից դուրս են արել, ասել են՝ գնա Ազատության հրապարակ»:

Պատգամավորը հավելեց, որ «Ելք» դաշինքում միշտ կան տարաձայնություններ, եղել են ու կլինեն հակասություններ: Բայց իրենք կարողացել են հարցերը քննարկել ու արդյունքում գալ համաձայնության: Փաշինյանը հավելեց, որ իր անձնական կարծիքը հետևյալն է՝ Ազատության հրապարակ գնալու կարիքը կա: