Առանց Լևոն Ալթունյանի յոլա կգնանք, առանց առողջապահության նախարարի՝ ոչ

Այսօր առողջապահության հարցերի հանձնաժողովում քննարկվում էր 2017թ. բյուջեի նախագծի` առողջապահական ոլորտին   վերաբերող մասը: ԲՀԿ-ական պատգամավոր Միքայել Մելքումյանը առողջապահության նախարար Լևոն Ալթունյանին հարցրեց, թե չի՞ կարող, արդյոք, Հայաստանը «յոլա գնալ» առանց առողջապահական պետական գործակալության:

Ալթունյանը պատասխանեց. «Առանց Լևոն Ալթունյանի յոլա կգնանք, առանց առողջապահության նախարարի՝ ոչ, առանց առողջապահության պետական գործակալության յոլա կգնաք, առանց այն գործառույթների, որը կոչված է կատարելու այդ գործակալությունը՝ ոչ»:

Նախարարը հավելեց, որ գոյություն ունեցող ֆինանսավորման համակարգը չի նպաստում բուժհաստատությունների զարգացմանը, որոշ դեպքերում` նույնիսկ արգելակում է: Ըստ նրա` նախարարությունը պատրաստում է առաջարկ, որը ներկայացնելու է կառավարությանը, հետո՝ ԱԺ-ին, որ ֆինանսավորումը լինի` ոչ թե բուժհաստատություններին բյուջե տրամադրելով, այլ հատկացումներ լինեն յուրաքանչյուր հիվանդի բուժման համար, այսինքն` գումարը փոխանցվում է տվյալ հիվանդի ախտորոշման դիմաց:

«Դա կբարելավի լավ բուժհաստատությունների վիճակը, իսկ վատ բուժհաստատությունները կփակվեն»,- ասաց նախարարը:

Միքայել Մելքումյանն արձագանքեց` ասելով, որ նախարարությունն իր քայլերը պետք է արագ իրականացնի:

Առողջապահության նախարարն էլ պատասխանեց, որ «արագ և որակով» սկզբունքը կարող է հակասական լինել ու անարդյունավետ: