Եթե ԱԺ արտահերթ ընտրություններ լինեն, ՀՀԿ-ն կմասնակցի դրանց. Գալուստ Սահակյան

Մեկնարկել է ՀՀԿ ԳՄ նիստը, որը վարում է ՀՀԿ նախագահ Սերժ Սարգսյանը: Լրագրողները նիստին մասնակցող  ԱԺ ՀՀԿ խմբակցության  պատգամավոր Գալուստ Սահակյանից հետաքրքրվեցին, արդյո՞ք աննարկվել է արտահերթ խորհրդարանական ընտրությունների անցկացման հարցը: Գալուստ Սահակյանը պատասխանեց, որ ՀՀԿ-ի հետ ոչ ոք նման հարց չի քննարկել, ուստի իմաստ չունի նման հարց քննարկել ՀՀԿ ԳՄ նիստում: Ըստ Գալուստ Սահակյանի, եթե վարչապետը գա ու ցանանա իրենց հետ այդ թեմայով հարց քննարկել, իրենք էլ կհավաքվեն ու կքննարկեն այդ հարցը:

Նա նշեց, որ նիստում քննարկել են երկրի ներքաղաքական վիճակը: «Իմ անձնական կարծիքով` արտահերթ խորհրդարանական ընտրություններ անցկացնելը սխալ է»,- ասաց Գալուստ Սահակյանը` չցանկանալով բացատրել, թե ինչու է այդպես կարծում:

Նա նշեց, որ եթե տեղի ունենան ԱԺ արտահերթ ընտրություններ, ՀՀԿ-ն կմասնակցի: «Ինչքան որ ձայն կհավաքենք, այդքան ձայներով էլ կպայքարենք»,- ասաց Գալուստ Սահակյանը: Հարցին, իսկ եթե ՀՀԿ-ն չանցնի՞ անցողիկ շեմը, Գալուստ Սահակյանը պատասխանեց.

«Նույնիսկ եթե ՀՀԿ-ն չհաղթահարի անցողիկ շեմը, ապա կմնա ամենաարժանապատիվ կուսակցությունը ողջ քաղաքական դաշտում»: Գալուստ Սահակյանի խոսքով` Սերժ Սարգսյանը հիմա էլ ակտիվ քաղաքականության մեջ է, իսկ ՀՀԿ-ն երբեք չի լուծարվի:

ԱԺ նախկին նախագահը չի կարծում, որ ՀՀԿ-ն պետք է գնա այն ճանապարհով, ինչ ցանկանում է կառավարությունը: