Ես իմ պարտականությունները լավ գիտեմ, Դուք ձեր պարտականությունների մեջ մնացեք. Տարոն Մարգարյանը՝ Փոստանջյանին

Երևանի ավագանու այսօրվա նիստում «Երկիր ծիրանի» խմբակցության ղեկավար Զարուհի Փոստանջյանը նշեց, որ այս պահին մի խումբ երեխաներ են հավաքվել քաղաքապետարանի մոտ, որպեսզի «բեմադրություն» դիտեն:

Նշենք, որ քաղաքապետարանի դիմաց բողոքի ակցիա է իրականացվում Փոստանջյանի դեմ. տոպրակներով ադի-բուդի են բերել, իսկ պաստառների վրա գրված է. «Զառային տարեք, Popcorn բերեք»:

Փոստանջյանն առաջարկեց երեխաներին հրավիրել քաղաքապետարան՝ մասնակցելու ավագանու նիստին և տեսնելու ավելի լավ բեմադրված ներկայացում: «Թող տեսնեն բեմադրություն՝ Ձեր մասնակցությամբ»,- ասաց Փոստանջյանը՝ դիմելով քաղաքապետին:

Երևանի քաղաքապետ Տարոն Մարգարյանը պատասխանեց, որ չգիտի՝ ովքեր են հավաքվել քաղաքապետարանի առջև, գուցե իրենց կողմնակիցներն այնտեղ ակցիա են իրականացնում:  

Փոստանջյանն առաջարկեց քաղաքապետին` մոտենալ և տեսնել, թե ինչու են այդ քաղաքացիները եկել քաղաքապետարանի շենքի մոտ: «Դա ձեր պարտականությունն է մոտենալ և լսել նրանց»,- ասաց նա:

Տարոն Մարգարյանը պատասխանեց, որ իր պարտականությունները լավ գիտի: «Երբ պետք լինի, ես կմոտենամ, Դուք ձեր պարտականությունների մեջ մնացեք»,- ասաց նա: