ՀՀ-ն անպայման կունենա վարչապետ, երկիրը պարալիզացված պահել չի կարելի. Վահրամ Բաղդասարյան

ԱԺ ՀՀԿ խմբակցությունն իր որոշումը կկայացնի ԱԺ նիստում հարցի քննարկումից հետո. լրագրողների հետ զրույցում հայտարարեց խմբակցության ղեկավար Վահրամ Բաղդասարյանը՝ պատասխանելով հարցին, թե ինչպե՞ս են քվեարկելու վարչապետի թեկնածու Նիկոլ Փաշինյանի ընտրության ժամանակ: Նա նշեց, որ ընտրությունները չտապալելու մասին ավելի վաղ արված հայտարարությունը վերաբերում էր քվորում ապահովելուն, նիստը չբոյկոտելուն:

«ՀՀ-ն կունենա վարչապետ, եւ մենք չենք խոչընդոտելու: Մենք վարչապետ անպայման կունենանք: Եթե ենթադրենք` այսօր չի լինում, 7-օրյա ժամկետում կլինի, երկիրը չի կարելի պարալիզացված պահել»,- ասաց Բաղդասարյանը:

Նա հաստատեց, որ երեկ ՀՀԿ ԳՄ նիստ է եղել, որը վարել է կուսակցության ղեկավար Սերժ Սարգսյանը: Բաղդասարյանը վստահեցրեց, որ Սարգսյանի չի միջամտում որոշումների կայացմանը, իսկ նրա հրաժարականը որակեց խոհեմ եւ իմաստուն:

Հարցին` հնարավո՞ր է հետագայում ՀՀԿ-ն առաջադրի վարչապետի իր թեկնածուին, նա պատասխանեց, որ քաղաքականության մեջ ոչինչ բացառել չի կարելի, եւ նշեց, որ ամեն ինչ կախված է քաղաքական զարգացումներից, իսկ իրավիճակը երկրում փոխվում է 5-10 րոպեն մեկ: Ըստ Բաղդասարյանի` արտահերթ ընտրությունները երկիրը հետ կգցեն: Եթե արտահերթի կարիք լիներ 2017 թվականից հետո, ըստ նրա, գոնե մեկ բողոքի ակցիա կլիներ:

«Բոլորը երջանիկ էին այն ժամանակ, այսինքն` խնդիրը արտահերթ ընտրությունների մեջ չէ»,- նշեց Բաղդասարյանը: