Կամերային երաժշտական թատրոնի տնօրենի մրցույթում հաղթեց Հռիփսիմե Առաքելյանը

Պետական կամերային երաժշտական թատրոնի տնօրենի թափուր պաշտոնի համար հայտարարված մրցույթում այսօր հանձնաժողովը հաղթող ճանաչեց Հռիփսիմե Առաքելյանին: Մշակույթի նախարարությունից տեղեկացնում են, որ մրցույթին մասնակցելու հայտ էր ներկայացրել չորս թեկնածու:

Հիմնվելով մրցութային հանձնաժողովի որոշման և հաղթած թեկնածուի համապատասխան դիմումի վրա` պետական թատրոնի տնօրենի նշանակումը կատարում է ՀՀ մշակույթի նախարարը։

Հռիփսիմե Առաքելյանը ծնվել է 1978 թվականին Երևանում:

2000 թվականին ավարտել է Խաչատուր Աբովյանի անվան հայկական պետական մանկավարժական համալսարանի բանասիրության ֆակուլտետը, 2008-ին՝ Հայաստանի Հանրապետության պետական կառավարման ակադեմիայի «Հանրային կառավարում» ֆակուլտետը (Հանրային կառավարման մագիստրոս):

Աշխատել է «Ար», «Հայ TV», «Կենտրոն», Հայաստանի հանրային հեռուստաընկերություններում, զբաղեցրել է բարձր պաշտոններ:

2011-2016թթ. ղեկավարել է Հայաստանի հանրային ռադիոյի «Ռադիոլուր» լրատվական ծրագիրը: 2016-ի դեկտեմբերից մինչև 2017–ի օգոստոս ամիսը զբաղեցրել է ՀՀ կառավարության տեղեկատվության և հասարակայնության հետ կապերի վարչության պետի պաշտոնը: Շուրջ վեց ամիս մարքեթինգային գործունեություն է իրականացրել Հորդանանում:

Ամուսնացած է, ունի երկու երեխա: