Տնօրեն չի ընտրվել. կամերային երաժշտական թատրոնի տնօրենի թեկնածուները մրցույթը չեն հաղթահարել

Երեկ տեղի է ունեցել Պետական կամերային երաժշտական թատրոնի տնօրենի թափուր պաշտոնի համար հայտարարված մրցույթը: Մշակույթի նախարարության մամուլի բաժնից տեղեկանում ենք, որ հայտ ներկայացրած չորս թեկնածուներից մեկը մրցույթին չի ներկայացել: Թեստավորման փուլը հաղթահարել է մրցույթին մասնակցած երեք թեկնածուներից մեկը, որն էլ չի հաղթահարել հարցազրույցի փուլը: Հանձնաժողովի ութ անդամներից վեցը դեմ են քվեարկել, երկուսը՝ կողմ: Մրցույթի արդյունքում հաղթող չի գրանցվել:

Պետական կամերային երաժշտական թատրոնի տնօրենի թափուր պաշտոնի համար հայտարարվելիք մրցույթի մասին կտեղեկացնենք ավելի ուշ:

Հիշեցնենք, որ թատրանում դեռևս 2016-ից անառողջ մթնոլորտ էր տիրում՝ հրաժարական էր տվել գեղարվեստական խորհուրդը, մութ պատմությունների հետ էր կապվում թատրոնի նախկին տնօրեն Վարդան Գրիգորյանի անունը: Թատրոնն անգամ հայտնվել էր փակման եզրին, իսկ մշակույթի նախկին նախարար Հասմիկ Պողոսյանի գնահատականով՝ թատրոնում ստեղծված իրավիճակն ուղղակի ներքին անհամաձայնության և ստեղծագործական գործընթացում առկա տարբեր մոտեցումների հետևանք էր: