Երկու հաղթող` Գյումրու թատրոնի տնօրենի մրցույթում

ՀՀ մշակույթի նախարարությունում այսօր անցկացվեց Գյումրու Վարդան Աճեմյանի անվան պետական դրամատիկական թատրոնի տնօրենի թափուր պաշտոնի մրցույթը, որին մասնակցելու հայտ էր ներկայացրել չորս թեկնածու:

ՀՀ մշակույթի փոխնախարար Արթուր Պողոսյանը տեղեկացրել է, որ մրցույթը հայտարարվել էր մոտ մեկ ամիս առաջ՝ որոշակի պահանջներով:

«Կոլեկտիվի առաջարկությունները հաշվի առնելով՝ ընդլայնվել է մասնագիտությունների ցանկը: Տնօրենի պաշտոնի նախորդ մրցույթին, երբ մասնագիտական ցանկը շատ ավելի սեղմ էր, մենք որևէ դիմում չունեցանք: Մրցույթի առաջին՝ գրավոր փուլին այսօր մասնակցեց երեք թեկնածու, մեկը չէր ներկայացել մրցույթին: Գրավոր փուլը հաղթահարեցին երկուսը: Սահմանված կարգի համաձայն` հանձաժողովի որոշումը կներկայացվի նախարարին: Երկու թեկնածուները նախարարին կներկայացնեն նաև իրենց դիմումները: Թեկնածուների փորձը, աշխատանքային կենսագրությունը հիմք ընդունելով՝ նախարարը կկայացնի վերջնական որոշում, և նրա համապատասխան հրամանից հետո հայտնի կդառնա թատրոնի նոր տնօրենի անունը»,- ասել է Պողոսյանը: