Ես Ձեզի չհարցրեցի. Տարոն Մարգարյանն` Ալեն Սիմոնյանին

Մեկնարկել է Երևանի ավագանու հերթական նիստը: Նիստի մեկնարկից առաջ «Ելք» խմբակցությունից Ալեն Սիմոնյանը նշեց, որ քանի որ այսօր ավագանու նիստի օրակարգում ընդգրկված է Մարտի 1-ի զոհերի հիշատակը հավերժացնող հուշակոթողի տեղադրման հարցը, ուստի նիստը կարող է մեկնարկել մեկ րոպե լռությամբ` ի հիշատակ Մարտի 1-ի զոհերի:

Ուշագրավ է, որ ավագանու ՀՀԿ-ական անդամներից ոչ բոլորը ոտքի կանգնեցին, ինչին ի պատասխան Սիմոնյանը նշեց, որ զարմանալի է այս փաստը: «Մարտի 1-ի զոհերը ՀՀ քաղաքացիներ էին, այդ թվում` նաև ոստիկաններ»,- ասաց նա:

Երևանի քաղաքապետ Տարոն Մարգարյանն արձագանքեց, թե քանի որ օրակարգում հուշարձանի տեղադրման հարցը կա, կարիք չկար այլևայլ գործողությունների: Ալեն Սիմոնյանի զարմանքին, թե մեկը մյուսի հետ ի՞նչ կապ ունի, քաղաքապետը պատասխանեց. «Բայց ես Ձեզի չհարցրի»: