Արմեն Սարգսյանն այն թեկնածուն է, որի շուրջ լայնախոհություն ու կոնսոլիդացիա կլինի. Վահրամ Բաղդասարյան

ԱԺ ՀՀԿ խմբակցության ղեկավար Վահրամ Բաղդասարյանը խորհրդարանում լրագրողների հետ զրույցում հայտնեց, որ իշխող կոալիցիան՝ ՀՀԿ-ն ու ՀՅԴ-ն, այսօր պաշտոնապես Արմեն Սարգսյանին առաջադրեցին որպես նախագահի թեկնածու: Նա նաև տեղեկացրեց, որ առաջադրման համար անհրաժեշտ ¼ ձայները հավաքվել և ուղարկվել են ԱԺ քարտուղարություն:

«Այսօրվա հանդիպումն ամփոփում էր, քանի որ Արմեն Սարգսյանը ներկայացրեց իր՝ տարբեր խմբերի հետ ունեցած հանդիպման արդյունքները, ասաց, թե ինչու է որոշել այս ծանր բեռը վերցնել իր վրա: Այսօր միասնական՝ ՀՅԴ-ի հետ, ստորագրահավաք կազմակերպեցինք և որոշեցինք Արմեն Սարգսյանին առաջադրել հանրապետության 4-րդ նախագահի թեկնածուի պաշտոնում»,- նշեց Բաղդասարյանը:

Իսկ արդյո՞ք կլինի լայն կոնսոլիդացիա Արմեն Սարգսյանի թեկնածության շուրջ, նա ասաց, որ դա պարզ կլինի քվեարկության ժամանակ, երբ հստակ կլինի, թե որքան ձայն է հավաքել ԱԺ-ում Արմեն Սարգսյանը: «Ինձ թվում է՝ Արմեն Սարգսյանն այն թեկնածուն է, որի շուրջ լայնախոհություն ու կոնսոլիդացիա կլինի»,- կարծիք հայտնեց պատգամավորը:

Դիտարկմանը՝ տեսակետ կա, թե Արմեն Սարգսյանի թեկնածության շուրջ նույնիսկ ՀՀԿ-ում կոնսոլիդացիա չի եղել, պարզապես ՀՀԿ-ն այն կուսակցությունն է, որտեղ նախագահ Սերժ Սարգսյանի որոշումը միաձայն է ընդունվում, և հարցին՝ արդյո՞ք ՀՀԿ-ում նախագահի թեկնածուի շուրջ քննարկում եղել է, Վահրամ Բաղդասարյանը պատասխանեց. «Միանգամից փարատեմ կասկածները՝ լայն կոնսոլիդացիայի հետ կապված: Ես մի անգամ պետք է առաջարկեմ, խնդրեմ, որ մեր Գործադիր մարմնի նիստերը բաց լինեն, որպեսզի տեսնեք, թե մեզ մոտ ինչպիսի քննարկումներ են լինում: Այդ քննարկումները շատ երկար են տեղի ունենում, այդ թվում` նաև նախագահի թեկնածուի հետ կապված հարցում: Բոլորիդ տեղյակ պահեմ, որ Սերժ Սարգսյանն իր կարծիքը հայտնել է ամենավերջում: Բնական է, որ բոլորը չեն կարող ունենալ նույն կարծիքը, բայց, երբ բանավեճերի ու ընդհանուր քննարկումների արդյունքում քաղաքական ուժը որոշում է կայացնում, քաղաքական որոշումը բոլորն են հարգում»:

Բաղդասարյանն ասաց, որ իրենց կուսակցությունում նախագահի թեկնածուի նաև այլ անունների շուրջ է քննարկում եղել, նաև` այն անունների, որոնք քննարկվել են մամուլում: