Դուք այնտեղ սեռական բռնություն տեսել ե՞ք. Շարմազանովը` Երևանի ավագանու նիստում միջադեպի մասին

 ՀՀԿ ԳՄ նիստից հետո ՀՀԿ խոսնակ Էդուարդ Շարմազանովը լրագրողների հետ զրույցում անդրադարձավ Երևանի ավագանու նիստում «Երկիր ծիրանի» և ՀՀԿ խմբակցությունների անդամների միջև ծեծկռտուքին: Շարմազանովի խոսքով` ՀՀԿ-ն անթույլատրելի է համարում ոչ քաղաքակիրթ, ոչ կոռեկտ, էթիկայի սահմաններից դուրս ցանկացած արարք և բռնություն: Խնդիրը գտնվում է իրավապահների տիրույթում, սակայն, Շարմազանովի համար անընդունելի է սեռական բռնության վերաբերյալ մեղադրանքները:

««Երկիր ծիրանի»-ի վարքագիծը համարում եմ ոչ քաղաքական, ոչ քաղաքակիրթ, թիկայի նորմերից դուրս: Երևանի քաղաքապետարանը ախոռագոմ չէ: Համամիտ եմ Անահիտ Բախշյանի հետ, որ դժվար է պատկերացնել, որ երեք կին իրենց նման ձևով կպահեն: Համամիտ եմ «Ելք»-ից Դավիթ Խաժակյանի հետ, որ տեղի ունեցածը խոսքի ազատություն չէր:Չի կարելի իշխանությանը քննադատելու նպատակով ամեն ինչ արդարացնել: Ի՞նչ սեռական բռնություն, դուք այնտեղ սեռական բռնություն տեսել ե՞ք»,- ասաց Շարմազանովը:

Շարմազանովի հավաստմամբ, Նուբարաշենի հետ կապված կոյուղաջրերի խնդիրը չէր առնչվում ոչ Տարոն Մարգարյանի, ոչ քաղաքապետարանի ուղղակի գործունեության հետ: Դա արդարադատության նախարարության Նուբարաշենի ՔԿՀ-ի տիրույթում էր գտնվում: «Ես չեմ ցանկանում, որ իմ երկրում իշխանությունն ու ընդդիմությունը ոչ քաղաքակիրթ լինեն: Ես ցանկանում եմ, որ իմ երկրում իշխանությունն ու ընդդիմությունը իրար հարգեն ու խնդիրները լուծվեն փոխադարձ հարգանքի մթնոլորտում»-ասաց Շարմազանովը: