Մարդիկ խառնել են, թե ում հետ գործ ունեն. Մարուքյանը՝ Երևանի ավագանու նիստում տեղի ունեցածի մասին

ԱԺ «Ելք» խմբակցության պատգամավոր, «Լուսավոր Հայաստան» կուսակցության նախագահ Էդմոն Մարուքյանը դատապարտում է այսօր Երևանի ավագանու նիստում «Ելք» խմբակցության անդամների նկատմամբ ՀՀԿ-ականների դրսևորած վարքագիծը: Խորհրդարանում լրագրողների հետ զրույցում նա նշեց, որ տեղի ունեցածը դատապարտելի է:

«Մեր ավագանու խմբակցության անդամներն ինչպես հարկն է` տեղն են դրել նրանց: Այն ոճով, որ իրենց պահում են Հանրապետականի ավագանու անդամները, այդ ոճով մերոնք չեն էլ կարող տեղը դնել, որովհետև ցիվիլ, կիրթ մարդիկ են, և դա է մեր ու նրանց միջև եղած տարբերոթյունը»,- ընդգծեց պատգամավորը, ապա հավելեց. «Իրենք իրենց ներսում պետք է քննարկեն տեղի ունեցածը և կարգի բերեն իրենց, թե չէ շատ վատ հետևանքներ սա կարող է ունենալ»:

Նա նշեց, որ այդպիսի վերաբերմունք Անահիտ Բախշյանի և, առհասարակ,  ավագանու որևէ անդամի հանդեպ դատապարտելի է:

Հարցին` ինչի՞ հետևանք էր այս ամենը, Մարուքյանը պատասխանեց, որ դրա պատասխանը պետք է տան ՀՀԿ-ականները և հասկանան, թե ում են բերել Հայաստանի թիվ մեկ քաղաքի ղեկավար: «Մարդիկ խառնել են, թե ում հետ գործ ունեն: Մենք ունենք ավագանու` 15 հոգուց բաղկացած խմբակցություն, և մեր խմբակցությունն իր դերակատարումը շատ լուրջ ունի և շատ անելիքներ ունի, և դրանք հերթով կանեն»,- ասաց նա:

Նշենք, որ այսօր Երևանի ավագանու նիստում միջադեպ էր տեղի ունեցել «Ելք» և ՀՀԿ խմբակցություններիանդամների միջև, «Ելք» խմբակցության անդամ Անահիտ Բախշյանի հասցեին վիրավորական արտահայտություններ էին հնչեցվել։