Ով առաջադրվի նախագահի կողմից, նա էլ արժանի է. Նահապետյանը` Վրաստանում ՀՀ դեսպանի մասին

Տևական ժամանակ է` Վրաստանում Հայաստանը դեսպան չունի: Այսօր խորհրդարանում լրագրողների հետ զրույցում ԱԺ պաշտպանության և անվտանգության հարցերի մշտական հանձնաժողովի նախագահ Կորյուն Նահապետյանն ասաց, որ մոտ ժամանակներում Վրաստանում նոր դեսպան է նշանակվելու:

«Այդ ամենը կատարվում է սահմանված ընթացակարգին համապատասխան, ընդ որում` այդ ընթացակարգերի որոշակի հատված գաղտնի է և հրապարակման ենթակա չէ»,- ասաց նա:

Հարցին` Սերգեյ Մինասյանի թեկնածությունը հանվե՞լ է, Նահապետյանը պատասխանեց. «Պետք է նկատի ունենալ մի պարզ բան` դեսպանների նշանակման գործընթացն ունի միջազգայնորեն ընդունված որոշակի ձևաչափեր, և այդ շրջանակում է ամեն ինչ տեղի ունենում: Հիմա դուք անուններ եք շրջանառում, որը, կարծում եմ, վերցրել եք մամուլից, պաշտոնապես որևէ մեկի կողմից դրա մասին չի հայտարարվել, թե ով է  առաջադրվել, և ով վերջում կնշանակվի դեսպան որևէ երկրում»:

Հարցին` Ռուբեն Սադոյանը արժանի՞ թեկնածու է, նա արձագանքեց. «Այն  անձինք, ովքեր կառաջադրվեն հանրապետության նախագահի կողմից դեսպանի պաշտոնում, ուրեմն արժանի են»: