Ըստ օրենսգրքի՝ քաղաքացուն կամ իրավաբանական անձին պատճառված վնասները հատուցում է ՀՀ-ն կամ համապատասխան համայնքը․ փաստաբանի անդրադարձը՝ քայքայված փողոցների խնդրին

Փաստաբան Ռուբինա Պետրոսյանը գրում է․

«Երևանում խրամատներ դարձած փոսերի պատճառով մեքենա վարելը դարձել է հերոսություն կամ աճպարարության հատուկ հմտությունների ցուցադրություն: Այս վիճակը շարունակվում է արդեն մեկ ամիս, որի հետևանքով տեղի են ունենում ճանապարհատրանսպորտային պատահարներ՝ վնասվում են քաղաքացիների մեքենաները, շղթայական բախումների պատճառ դառնում, առաջնում վթարային իրավիճակներ: Մարդիկ ստիպված վարում են հանդիպակաց գծով, որպեսզի կարողանան շրջանցել խրամատ դարձած փոսերը և ստիպված չլինեն կրելու գույքային վնասներ:

ՀՀ քաղաքացիական օրենսգրքի 18-րդ հոդվածի համաձայն՝ պետական և տեղական ինքնակառավարման մարմինների կամ դրանց պաշտոնատար անձանց ապօրինի գործողությունների (անգործության) հետևանքով քաղաքացուն կամ իրավաբանական անձին պատճառված վնասները հատուցում է Հայաստանի Հանրապետությունը կամ համապատասխան համայնքը:

Երևանում ստեղծված այս իրադրության պատասխանատուն քաղաքային իշխանությունն է, որի կողմից առկա իրավիճակի լուծմանն ուղղված քայլեր չեն ձեռնարկվում:

Սա հրատապ խնդիր է և պահանջում է անհապաղ լուծում Երևանի քաղաքապետարան / Yerevan Municipality»: