Քաղաքացիական հագուստով թուրք ոստիկանները հայերեն են խոսում՝ ծպտյալ հայերին բացահայտելու համար

Ներկայիս Թուրքիայի տարածում գտնվող հայկական Տիգրանակերտ (Դիարբեքիր) նահանգի Հազրո շրջանում, ըստ պնդումների, թուրք ուժայինները ճնշում են տեղի 76-ամյա բնակիչ Սանիե Էքթին:

Ըստ «Ակօս»-ի՝ Էքթին բնակվում է Հազրո գյուղում: 1990-ականներին պետության կողմից դատարկված գյուղ նա վերադարձել է 2000-ականներին: Տարեց կինը երկար տարիներ եղել է քրդական քաղաքականության ակտիվիստներից: Կայքի հաղորդմամբ՝ Էքթին բազմիցս կալանավորվել է, կտտանքների ենթարկվել, ձերբակալվել: 76-ամյա կինը Թուրքիայում հայտնի է Դիարբեքիրի  փաստաբանների բյուրոյի նախագահ Թահիր Էլչիի սպանությունից դեռևս կարճ ժամանակ առաջ ունեցած ելույթով: Ներկայումս նա պարբերաբար ենթարկվում է թուրք հատուկ ուժայինների ճնշումներին:

Միջանկյալ նշենք, որ Տիգրանակերտում և ներկայումս քրդաբնակ այլ շրջաններում արդեն երկար ժամանակ է՝ բախումներ են ընթանում թուրք ուժայինների և քուրդ զինյալների միջև:

76-ամյա կնոջ թոռը՝ Ջեյլան Աքչան, «Ակօս»-ի հետ զրույցում պատմել է իր մեծ մոր նկատմամբ ճնշումների մասին:

«Հազրո գյուղում նախորդ ամիսներին սկսվեցին հատուկ գործողությունները: Մեծ մորս (մոր մայրը) ապրած գյուղն էլ է ներառվում այդ շրջաններում: Հատուկ ուժայինները մի քանի անգամ մտել են տուն և ճնշել նրան: Սահմանին քեռուս սպանությունից հետո ավելացան ճնշումները: Մեծ մորս դեմ մեղադրանք առաջադրվեց այն բանի համար, որ քեռուս մահվան օրը դուրսը լուսավորելու համար նա էլեկտրական լար էր վերցրել, նրան մեղադրեցին «էլեկտրական լարով ռումբ պատրաստելու» մեջ»,- պատմել է Աքչան:

Նրա խոսքով՝ դատարանը տարեց կնոջը, որպես պատիժ, պարտադրել է վճարել 5500 թուրքական լիրա:

«Անգամ դրանից հետո չեն դադարել ճնշումները: Մեր տունը գյուղից մի փոքր դուրս է ընկնում: Հատուկ ուժայինները եկել են տուն ու ասել, որ տունն օգտագործելու են որպես շտաբ, ու զենքեր տեղադրել տանիքին: Մեծ մայրս կապված է կրոնին, «Ղուրան» կարդացող կին է, բայց կարդում է նաև Աստվածաշունչ, որը պահված է տան գրադարանում: Ուժայինները նկատել են, որ տանն Աստվածաշունչ կա: «Դա հայ ես, եթե հայ ես, մի' թաքցրու, մեզ ասա» ասելով՝ նրան ճնշել են: Դրանից հետո սկսել են գյուղում տարածել, որ «այս կինը հայ է, ծպտյալ հայ»: Անգամ եղել են քաղաքացիական հագուստով ոստիկաններ, որոնք մտել են տուն ու հայերեն խոսել»,- պատմել է թոռնուհին: