Բարսելոնայից բացի, հարձակումներ են եղել իսպանական այլ քաղաքներում. նոր մանրամասներ

Արդեն տեղեկացրել ենք, որ  Բարսելոնա քաղաքում մեքենայով վրաերթի են ենթարկել փողոցում զբոսնող մարդկանց:

Лента.ру-ն հայտնում է, որ նույն օրը նաև այլ հարձակումներ են եղել, որոնք, ըստ իրավապահների, հնարավոր է կապ ունեն միմյանց հետ:

Այսպես`քաղաքի մեկ այլ հատվածում մեքենան վրաերթի է ենթարկել ոստիկանների: Իրավապահներին վրաերթի ենթարկած մեքենայում հայտնաբերվել է սպանված իսպանացի, ում դանակահարել են անհայտ անձինք:

Բացի այդ`  կատալոնական Ալկանար քաղաքում որոտացել է 2 պայթյուն, ինչի հետևանքով տուժել են ոստիկաններ:

Ավելի ուշ Բարսելոնայից դեպի հարավ ընկած Կամբրիլս քաղաքում ահաբեկիչների ևս մի խումբ փորձել է կրկնել Բարսելոնայի ահաբեկչությունը՝ ֆուրգոնով վրաերթի ենթարկելով մարդկանց: Նրանց գործողությունների հետևանքով տուժել է 6 մարդ:  5 հարձակվողները սպանվել են:

Վերջին տվյալների համաձայն` ահաբեկչության հետևանքով 13 մարդ է զոհվել, 100 մարդ` վիրավորվել: Ահաբեկչության գործով ձերբակալվել է 2 կասկածյալ: Կատարվածի պատասխանատվությունը ստանձնել է «Իսլամական պետություն» ահաբեկչական խմբավորումը: