Սովոր եմ, որ ինձ մտրակում ու քարկոծում են. Վիգեն Չալդրանյան

«Ոսկե ծիրան» 14-րդ միջազգային կինոփառատոնին մասնակցում է նաև ռեժիսոր Վիգեն Չալդրանյանն իր` «Վարդապետի լռությունը» ֆիլմով:

Լրագրողների հետ զրույցում Չալդրանյանը նշեց, որ ֆիլմի սցենարը երկար է խմորվել իր մեջ, բայց այն գրվել է վեց ամսում:  Ըստ նրա` դժվար է ասել, թե ֆիլմի գաղափարը ինչպես է ծագել, քանի որ երբեմն գաղափարն է գալիս ու գտնում ռեժիսորին:

«Մեզ համար դժվար փորձություն էր Փարիզի հոգեբուժարանում նկարահանումներ իրականացնելը: Տեղի անձնակազմը շատ լավ գիտեր, որ մենք ֆիլմ ենք նկարում, բայց այնպես արեցինք, որ անձնակազմն իրեն զգաց իր ափսեում և կարծես ժամանակի անիվը հետ էր պտտվել: Մեզ ընդամենը 1,5 ժամ էր տրված հոգեբուժարանում նկարահանումներն իրականացնելու համար: Երկրորդ դուբլի հնարավորություն մեզ տրված չէր: Իմ ուզածի 50 տոկոսը ստացանք, բայց այն իր ճիշտ տեղը գտավ ֆիլմում»,-ասաց Չալդրանյանը:

Նա նշեց նաև, որ ֆիլմից հանել են շատ կադրեր, որոնք, ճիշտ է, լավ էին ստացվել, բայց դրանցում ռեժիսորը չի տեսել այն, ինչ պետք է: Ըստ Չալդրանյանի` ֆիլմը ներկայացնում է ոչ թե Կոմիտասին, այլ նրա «Մեծ Լռությունը»: «Ֆիլմի մասին կարծիքները տարբեր են, այն շատ տարբեր են ընկալում: Բայց ինձ ասել են, որ «Ոսկե ծիրանի» ժամանակ ցուցադրելիս` ժյուրին հոտնկայս ծափահարել է: Բացի այդ` ինձ համար կարևոր էր Փելեշյանի կարծիքը, այն ինձ համար հավասարազոր է Աստծո կարծիքին: Եվ նա հանկարծ ինձ ասում է` քեզ լավ նայիր, դու կարևոր ես` ինձնից ու Փարաջանովից հետո: Նման խոսքերին ես վարժված չեմ, ես սովոր եմ, որ ինձ մտրակում ու քարկոծում ես»,-ասաց Չալդրանյանը: