Անարդարության դեմ անարդարությամբ չենք կարող պատասխանել. Արթուր Դավթյան

Գլխավոր դատախազ Արթուր Դավթյանն այսօր խորհրդարանում լրագրողների հետ զրույցում անդրադարձավ դատարանի նկուղում «Սասնա ծռերի» անդամներին ծեծի ենթարկելու դեպքին:

«Որպես գլխավոր դատախազ՝ ցանկացած ծեծի ու բռնության դրսևորում որակում եմ որպես հանցագործություն: Ձեր մատնանշած դեպքի կապակցությամբ ոստիկանները համապատասխան զեկուցագրեր են ներկայացրել, գործով ամբաստանյալներն ու նրանց պաշտպանները ներկայացրել են հաղորդումներ: Եվ այդ նյութերն ամբողջությամբ մեր կողմից ուղարկվել են Հատուկ Քննչական ծառայություն»,- ասաց նա:

Դատախազի խոսքով՝արդեն իսկ հարուցվել է քրեական գործ, իրականացվում է նախաքննություն: Նա նշեց, որ այս պահին գործով կալանավորվածներ չկան:

Հարցին, որ եթե հակառակը տեղի ունեցած լիներ՝ ընդդիմադիրները ծեծեին ոստիկաններին, կալանավորվածներ դարձյա՞լ չէին լինի, Դավթյանը պատասխանեց, որ ցանկացած դեպքում, դա կլինի ոստիկանի կողմից կատարված արարք, թե քաղաքացու, դա օրենքում ունի իր գնահատականները:

«Մենք նախ պետք է ունենանք բավարար ապացույցների համակցում, որ որևէ մեկին մեղադրանք առաջադրենք: Այո, ֆիքսված են բռնություններ, եթե ոչ մի բան ֆիքսած չունենայինք, մենք չէինք ունենա նաև քրեական գործի հարուցում: Մենք ունեցել ենք առերևույթ տվյալներ, հարուցել ենք քրեական գործ, բայց  բռնություններն ինչ հանգամանքներում են առաջացել, դրանք արդեն քրեական գործի քննության ընթացքում պետք է ստուգվեն: Եթե կպարզվի, որ որևէ մեկն անցել է իր լիազորությունների սահմանը, միանշանակ կպատժվի»,- ասաց նա:

Հարցին, թե ոստիկանն իրավունք ունի՞ դատարանում մեղադրյալին ծեծել, նա պատասխանեց, որ գնահատականն այդպես չենք կարող հնչեցնել, Ոստիկանության մասին օրենքը նախատեսում է ոստիկանի կողմից ֆիզիկական ուժի կիրառման հիմքեր: Եվ հարուցված քրեական գործի նախաքննության նպատակը հենց այն է, որ պետք է պարզել, թե արդյոք անհրաժեշտ հիմքեր առկա եղել են ֆիզիկական ուժ գործադրելու համար, և արդյոք համաչափ ուժ է գործադրվել:

Հարցին՝ գլխավոր դատախազություն կատարած այցի ժամանակ Սերժ Սարգսյանն օրերս հայտարարել էր, որ պետք է երկրում անարդարությանը պատերազմ հայտարարել, հաշվի առնելով երկրում տիրող համատարած անարդարության մթնոլորտը, ի՞նչ գործողություններ են անելու իրենք: Արթուր Դավթյանը նշեց, որ անարդարության դեմ անարդարությամբ չեն կարող պայքարել, պետք է պայքարեն օրենքով նախատեսված միջոցներով և որ ամենուր են իրենք անարդարության դեմ պայքար իրականացնում:

Լրագրողները նշեցին, որ արդարություն չկա Հայաստանում, քանի որ տարիների շարունակ տարբեր քրեական գործերով շատ անձինք չեն պատժվել: Գլխավոր դատախազն ասաց, որ համամիտ չէ այդ պնդումներին, բազմաթիվ դեպքեր են եղել, որ հանցանքի կատարումը հիմնավորվել է, այդ թվում ոստիկանի ու պաշտոնյայի կողմից, նրանք դատի են տրվել:

«Խնդիրը հետևյալն է՝ մենք արդյոք ունենու՞մ ենք բավարար ապացույցների համադրություն՝ որևէ մեկին մեղադրելու կամ դատարան ուղարկելու համար: Ես չեմ ասում, որ մեր մոտ ամեն ինչ փայլուն է, իհարկե, կան խնդիրներ, և այդ խնդիրների լուծմանն ենք մենք միտված: Իսկ աշխարհում ձեզ հայտնի՞ է մի երկիր, որտեղ չկա խնդիր»,- ասաց Դավթյանը