Ի՞նչը չներվեց Հովիկ Աբրահմյանին. Նիկոլ Փաշինյան

ԱԺ արտահերթ նիստում ՀՀ 2016 թվականի պետական բյուջեի կատարման մասին տարեկան հաշվետվություն քննարկման ժամանակ ելույթ ունեցավ «Ելք» խմբակցության ղեկավար Նիկոլ Փաշինյանը: Նա նշեց, որ 2016 թվականը հիշարժան էր նրանով, որ տեղի ունեցավ կառավարության փոփոխություն՝ Հովիկ Աբրահամյանի կառավարությունը հրաժարական տվեց, և եկավ  նոր կառավարություն` Կարեն Կարապետյանի ղեկավարությամբ:

«Կարևոր եմ համարում քննարկելը, վերլուծելը, թե ինչո՞ւ հեռացավ Հովիկ Աբրահամյանը, վարչապետն ինչո՞ւ պաշտոնանկ եղավ կամ արվեց: Կարելի է ասել, որ տնտեսական ցուցանիշներն էին վատը, բայց փորձը ցույց է տվել, որ մի քանի տարի շատ ավելի վատ ցուցանիշներ ենք ունեցել, բայց կառավարություններն ու վարչապետերը շարունակել են պաշտոնավարել»,- ասաց պատգամավորը և նշեց, որ շատ հարցեր կան՝ ի՞նչն էր, որ չներվեց Հովիկ Աբրահամյանին:

«ՊՊԾ գնդի իրադարձությունները, օրինակ, ներվեցին ԱԱԾ պետ Կուտոյանին, ոստիկանության պետ Վլադիմիր Գասպարյանին, բայց ի՞նչը Հովիկ Աբրահամյանին չներվեց»,- հսրցրեց նա, ապա նշեց, որ կարծում է՝ ՀՀ-ն թևակոխում էր իշխանության տրասֆորմացիայի մի շրջան, և Հովիկ Աբրահամյանը, ՀՀԿ-ի հնաբնակներից լինելով, 17-18 թվականներին կարող էր իր շուրջը հանրապետական շրջանակների որոշակի կոնսոլիդացիա ապահովել՝ այսպիսով որոշակիորեն խառնելով ՀՀԿ-ի պլանները: Ըստ պատգամավորի` դա էր Հովիկ Աբրահամյանի հեռացման պատճառը:

Այնուհետև Փաշինյանը հարցրեց՝  ինչո՞ւ վարչապետ նշանակվեց Կարեն Կարապետյանը: Ինքն իր հարցին պատասխանելով` նա ասաց, որ պատճառներից ամենակարևորը այն է, որ Կարեն Կարապետյանը Հանրապետական կուսակցության հին անդամներից չէ և մեծ պոտենցիալ չունի ՀՀԿ-ում` իր շուրջ կոնսոլիդացիա ապահովելու համար:

Ըստ պատգամավորի՝ այն, որ Կարեն Կարապետյանը ԱԺ-ում կառավարության ծրագրի քննարկման ժամանակ նշեց, որ ինքը չի մտնում այն մարդկանց շրջանակի մեջ, ովքեր Սերժ Սարգսյանին համոզում են 2018 թվականին լինել վարչապետ, և պատրաստ է անձամբ լինել վարչապետ 2018 թվականին, դա հետաքրքիր է և որոշակի պոտենցիալ է պարունակում` ներքաղաքական իրավիճակը փոխելու: Փաշինյանի կարծիքով` սա էր պատճառը, որ նախագահը հայտնվեց կառավարության նիստում: