Վիճաբանություն` ԱԺ-ում. «Ելք»-ն ու ՀՀԿ-ն հակադարձում էին միմյանց

Ազգային ժողովի նիստը հարթ չանցավ. քվեարկությունից առաջ տեղի ունեցավ բուռն վիճաբանություն «Ելք» և ՀՀԿ խմբակցությունների միջև: Նախքան քվեարկությունը վարման կարգով ելույթներ ունեցան երկու խմբակցությունների պատգամավորները:

Նախ` «Ելք»-ը ՀՀԿ-ին հորդորեց չհամեմատվել իրենց հետ և նշեց, թե գիշեր-ցերեկ երազում են տեսնել «Ելք»-ին պառակտված: «Մեր դարդով ու ցավով մի' տապակվեք»,- ասաց Էդմոն Մարուքյանը:

ՀՀԿ խմբակցության ղեկավար Վահրամ Բաղդասարյանը վարման կարգով ձայն խնդրեց և նշեց. «Մի փոքր համբերեք` մինչև 18 թվական»:

Վարման կարգով ձայն խնդրեց «Ելք» խմբակցությունից Գևորգ Գորգիսյանը, սակայն նրա խոսափողը չէին ուզում միացնել, ինչին Գորգիսյանը արձագանքեց. «Մի' միացրեք, իմ ձայնը բավականին բարձր է»: Երբ նրա խոսափողը միացրեցին, նա շարունակեց. «Պարո՛ն Բաղդասարյան, ի տարբերություն ձեզ, մեր նորընտիր պատգամավորները մասնակցել են քարոզարշավին և ունեն հեղիանակություն և իրենց վստահված ձայներով են ընտրվել: Մենք քայլել ենք պադյեզդներով և չենք վախենում»,- ասաց նա:

«Ելք» խմբակցության պատգամավոր Արարատ Միրզոյանն էլ հայտարարեց, թե, հետևելով վարչապետի հորդորին, փաստերով է եկել և նրան փոխանցելու համար բերել է ընտրակեղծարարությունը հաստատող փաստաթղթեր, որոնք ձեռք են բերել աղբարկղից: «Անուն-ազգանուներով, հեռախոսի համարներով, հասցեներով... Իրավապահներին փոխանցվել է, և ծածկադմփոց չանելու դեպքում կլինեն մի քանի ազատազրկումներ, այդ թվում` մի քանի մարդկանց, որ նստած են այստեղ»,- ասաց նա:

ԱԺ փոխնախագահ Էդուարդ Շարմազանովը կոչ արեց հանդարտեցնել կրքերը: «Հանգիստ, բոլորս էլ ունենք ժողովրդի վստահությունը և ընտրվել ենք, որ ծառայենք ժողովրդին, եկեք` ծառայենք»,- ասաց նա և հորդորեց քվեարկության կարգի մասին խոսել, ոչ թե ցույց տալ, թե ով ինչ է ու ինչ ունի:

Վեճը սկսվեց Վահրամ Բաղդասարյանի հայտարարությունից, ով հղում արեց երջանկահիշատակ Վահան Հովհաննիսյանին, թե նորընտիր պատգամավորները նման բարձրագոչ հայտարարություններ անելիս հիշեն «պադյեզդների վտանգավոր պատմությունը»: Հիշեցնենք, որ Վահան Հովհաննիսյանը հայտարարել էր. «Զգույշ եղեք, ձեզ դալաններում կծեծեն»:

Նշենք, որ Բաղդասարյանի այս հայտարարությունը հունից հանեց «Ելք» խմբակցության ղեկավար Նիկոլ Փաշինյանին, ով արձագանքեց.«Էսպիսի բաներ մեր մասին չասեք, շշով կտամ, պադեզդի մակարդակ եք ուզում, եկեք գնանք…»:

Կառավարության ծրագրի քվեարկությունից հետո բոլորը, բացի «Ելք»-ից, մոտեցան, շնորհավորեցին վարչապետին, իսկ Արարատ Միրզոյանն էլ նրան հանձնեց փաստաթղթերը: