Ունենք օտարերկյա ներդրումների զուտ հոսքի բացասական և ուղղակի հոսքի դրական ցուցանիշներ. նախարար

Այսօր կառավարության նիստից հետո տնտեսական զարգացման և ներդրումների նախարար Սուրեն Կարայանը լրագրողների հետ ճեպազրույցում անդրադարձավ օտարերկրյա ուղղակի ներդրումների և զուտ հոսքերի հետ կապված առաջին եռամսյակում հրապարակված վիճակագրությանը: Նրա խոսքով` օտարերկրյա զուտ հոսքերը ունեն բացասական ցուցանիշ, ինչը պայմանավորված է այն հանգամանքով, որ բազմաթիվ կանխավճարներ են իրականացվել ներդրումային ծրագրի շրջանակներում, որպեսզի հիմնական միջոցներ գան ՀՀ, և դա երևում է որպես բացասական: Իսկ ուղղակի ներդրումների հոսքը ունի դրական ցուցանիշ, այն մոտ 19.7 միլիարդ դրամի շրջանակներում է: Նաև տեղական ներդրողների կողմից են իրականացվել ներդրումներ:

«Այնպես որ այն ծրագրերը, որոնց մասին հայտարարել ենք, գնում են իրենց բնականոն հունով: Օտարերկրյա ներդրումների զուտ ներհոսքի բացասական լինելը չի կարելի համարել որպես կապիտալի արտահոսք Հայաստանից, որովհետև դրա մեջ է մտած այն գումարները, որոնք Հայաստանի կազմակերպությունների կողմից՝ որպես կանխավճար կամ որպես վճար, փոխանցվել են օտարերկրյա  արտադրողներին՝ հիմնականում միջոցներ ձեռք բերելու համար»,- ասաց նախարարը:

Կարայանը վստահեցրեց, որ ներդրումային ծրագրերը բոլորն էլ ընթացքի մեջ են, և բոլոր այն խոստումները, որոնք տվել են, ոչ միայն կատարելու են, այլ` գերակատարելու: