Խորհրդարանական կառավարման դեպքում դրսի ճնշումները մեկ անձի վրա ուղղված չեն լինելու. սահմանադրագետ

Գործող՝ կիսանախագահական կառավարման համակարգի պարագայում Արցախի հիմնախնդրի հետ կապված պատասխանատվությունն ընկնում էր մեկի՝ նախագահի վրա, իսկ նոր՝ խորհրդարանական կառավարման համակարգի պարագայում Արցախի անվտանգության պատասխանատվությունն ընկնում է վարչապետի վրա, խնդրի հիմնալուծման պատասխանատվությունը՝ խորհրդարանի վրա. լրագրողներին հայտնեց սահմանադրական իրավունքի մասնագետ Վարդան Այվազյանը:

Նա հիշեցրեց, որ կիսանախագահական կառավարման ձևի ժամանակ գործադիր իշխանությունը ձևավորվում է նախագահի կողմից, նրա կամքն ունի մեծ ուժ, մինչդեռ խորհրդարանականի դեպքում արդեն Ազգային ժողովի կողմից է ձևավորվում գործադիր իշխանությունը:

«Կիսանախագահական կառավարման ձևի ժամանակ նախագահը համագործակցում է գործադիր մարմնի հետ, բայց նախագահը վերպետական մարմին է՝ ավելի բարձր է կանգնած իշխանության մաս կազմող մյուս ճյուղերից: Դեռևս գործող դեպքում գոյություն ունի անհատական պատասխանատվության ինստիտուտ, նոր կառավարման պարագայում գործում է կոլեկտիվ պատասխանատվությունը»,- ասաց Այվազյանը՝ հավելելով, որ տարածված համեմատություն է այն, որ խորհրդարանական կառավարման անցման պարագայում նախագահը դառնում է Անգլիայի թագուհի: «Իհարկե, կարելի է նման համեմատություն անել»,- ասաց նա, ապա շեշտեց, որ այդ պաշտոնի պատասխանատվությունը ևս մեծ է:

Սահմանադրագետը շեշտեց նաև, որ խորհրդարանական կառավարման համակարգի անցման պարագայում դրսի ճնշումներն ուղղված են լինելու ոչ թե մեկ անձի վրա, այլ կառավարման յուրաքանչյուր օղակ ունենալու է իր պատասխանատվության կարևոր մասը: