Վերցրեք նայեք՝ ինչ եմ ասել բանավեճից հրաժարվելու մասին. Տարոն Մարգարյանը՝ լրագրողներին

Երևանի ավագանու ընտրությունների քարոզարշավը շարունակվում է: ՀՀԿ քաղաքապետի թեկնածու Տարոն Մարգարյանն այսօր Աջափնյակ վարչական շրջանում բնակիչների հետ հանդիպումից հետո զրուցեց լրագրողների հետ:

Լրագրողների այն հարցին, թե ավագանու թեկնածուները ամեն օր իրենց ելույթներում ասում են, որ Տ. Մարգարյանը հարստացել է բյուջեի հասցեին, ՀՀԿ թեկնածուն պատասխանեց. «Ես այդ հարցին պատասխանել եմ, և ինձ թվում ա բան չունեն ասելու, դա են պնդում»:

Այն հարցին, թե Տ. Մարգարյանը եթե արել է ամեն ինչ, ինչու չի գնում բանավեճի և ասում այն, գուցե վախենում է՝ Մարգարյանն ասաց. «Ինձ թվումա բանավեճի մասին ես արդեն իմ պլաններում ասել եմ, վերցրեք և նայեք, թե ինչ եմ ասել: Մեր կատարած աշխատանքները և մեր ծրագրերը՝ մեր ժողովրդին ենք ներկայացնում, բանավեճով չենք ներկայացնում: Բանավեճը՝ իմ համար, ես զարմանում եմ անընդհատ այդ հարցն եք դուք ուզում տալ. հստակ պատասխանը ստացել եք այդ ամեն ինչից»:

Բանավեճի ամբողջ աշխարհում ընդունված լինելու փաստին՝ Տ. Մարգարյանը անդրադարձավ, պատասխանելով, որ յուրաքանչյուր ուժ ինքն է ընտրում, թե ինչպիսին լինի իրենց քարոզարշավը, իսկ իերնք այսպիսինն են ընտրել: