«Աթեշյանը պետության դրածոն է». Թուրքիայի խորհրդարանի հայ պատգամավորները դեմ են Աթեշյանի քայլերին

Տեղեկացրեցինք, որ Ստամբուլի նահանգապետարանն անակնկալ կերպով միջամտել է Պոլսո Հայոց պատրիարքական ընտրությունների անցկացմանը: Նախքան ընտրությունների սկսվելը՝ Ստամբուլի նահանգապետի տեղակալը գրություն է ուղարկել՝ իրավաբանորեն «անհնար» համարելով պատրիարքական ընտրությունների գործընթացի մեկնարկը:

Թուրքիայի խորհրդարանի հայ պատգամավորներ՝ քրդամետ Ժողովուրդների Դեմոկրատական կուսացկության պատգամավոր Կարո Փայլանն ու Ժողովրդա-հանրապետական կուսակցության կին պատգամավոր Սելինա Դողանը խիստ քննադատության են ենթարկել Պոլսո Հայոց պատրիարքի փոխանորդ Արամ Աթեշյանին:

Ըստ Փայլանի` չընդունելով Պոլսո Հայոց պատրիարքի նոր տեղապահի ընտրությունների արդյունքն ու հրաժարվելով հեռանալ իր պաշտոնից՝ Արամ Աթեշյանն ապացուցել է, որ «պետության կողմից նշանակված հսկիչ է՝ դրածո»: «Տեղի է ունեցել նոր տեղապահի ընտրություն, և մենք պետք է հաղթած արքեպիսկոպոս Բեկչյանին շնորհավորենք ու անցնենք պատրիարքի ընտրությունների նախապատրաստմանը»,- ասել է նա: 

Սելինա Դողանն իր հերթին հայտարարել է, որ Աթեշյանի ու Ստամբուլի նահանգապետարանի կատարած հայտարարությունը որևէ իրավական հիմք չունի: «Սա անընդունելի է և չունի իրավական ոչ մի հիմք»,- ասել է նա՝ նշելով, որ այս միջամտությունն ավելի է բարդացրել առանց այն էլ խճճված գործընթացը: