Օրենքը գովելու համար Վարդան Արամյանը օրինակ բերեց Թուրքիայում ՌԴ դեսպանի սպանությունը

Այսօր ֆինանսների նախարար Վարդան Արամյանն անդրադարձավ լրագրողների այն հարցին, որը վերաբերում էր վերջերս ԱԺ կողմից հաստատված օրենքի նախագծին, ըստ որի` ՀՀ նախագահի, վարչապետի և ԱԺ նախագահի ծախսերը պետք է գաղտնի պահվեն:

Դիտարկմանը` մի կողմից` վարչապետը հայտարարում է կոռուպցիայի դեմ պայքարի, գնումների ոլորտում թափանցիկության մասին, մյուս կողմից` նման օրենք է հաստատվում, որը պոտենցիալ դաշտ է կոռուպցիայի համար, նախարարը պատասխանեց, որ կան հարցեր, որոնք չպետք է ֆետիշացնել, էմոցիոնալ ընկալել: Նրա խոսքով՝ միջազգային պրակտիկայում, սովորաբար, գաղտնի են պահվում երկրի առաջին դեմքերի ծախսերը, քանի որ դա անմիջականորեն կապված է անվտանգության հետ, և գաղտնի պահելով՝ այդ ռիսկերը չեզոքացվում են: Նախարարը օրինակ բերեց Թուրքիայում օրեր առաջ տեղի ունեցած` ՌԴ դեսպանի սպանությունը:

«Եթե որևէ մեկը տեղեկանում է, թե որ ընկերությունների մեքենաներն են սպասարկում նախագահին, որ ընկերությունն է ճաշ, սնունդ մատուցում, որ ռեստորանում է նախագահը հյուրերի հետ ճաշում, ապա մեծանում են վտանգային ռիսկերը: Ահա, թե ինչու կապալառուի տվյալները պետք է գաղտնի լինեն: Կան անվտանգության կանոններ, որոնք պետք է պահպանենք»,- ասաց նախարարը: