The Guardian-ը Թուրքիայում խոսքի ազատության սահմանափակման կապակցությամբ նախաձեռնություն է սկսել

Անգլիական հայտնի The Guardian պարբերականը «Էրդողանն ու խոսքի ազատությունը. ի՞նչ են զգում ներկայումս Թուրքիայում ապրողները» թեմայով հարցում է անցկացրել:

Պարբերականը նշել է, որ մի ժամանակ մուսուլմանական երկրների շարքվում Թուրքիան «օրինակելի էր իր ժողովրդավարությամբ», մինչդեռ այսօր վերածվել է լրագրողների համար աշխարհի ամենամեծ բանտի:

Պարբերականն ընդգծել է նաև այն փաստը, որ 2014-ին Էրդողանի՝ նախագահ դառնալուց ի վեր երկրում խոսքի ազատությունն սկսել է սահմանափակվել` նշելով, որ բոլոր նրանք, ովքեր պետական շահերին են հակասում, ենթարկվում են ցմահ ազատազրկման:

The Guardian-ը նաև ուշադրության է արժանացրել այն փաստը, որ համացանցում սեփական մտքերն արտահայտելու համար ձերբակալվում են նաև քաղաքացիներ:

«Էրդողանը պահպանում է իր հարաբերությունները ԱՄՆ նախագահ Թրամփի, Անգլիայի վարչապետ Թերեզա Մեյի և ՌԴ նախագահ Վլադիմիր Պուտինի հետ և ապրիլի 16-ին կայանալիք հանրաքվեի միջոցով փորձում է իր Սահմանադրության ուժերն ավելացնել»,-գրել է The Guardian-ը:

Կայքը նաև դիմել է իր ընթերցողներին, որ պատմեն Թուրքիայում  տիրող իրավիճակի՝ իրենց վրա թողած ազդեցության, խոսքի ազատության սահմանափակման՝ իրենց առօրյա կյանքի վրա թողած ազդեցության և այլ խնդիրների մասին:

The Guardian-ն այդ մասին իրեն պատմած ընթերցողների մտահոգություններն ու խորհուրդները կհրապարակի նյութի տեսքով: Ցանկության դեպքում կայքը չի հրապարակի այդ մասին պատմողների անունները: