Թուրքիայում խոսքի ազատության հարցում «կարմիր գիծ»-ը հերթական անգամ հատվել է. Եվրախորհրդարանի նահագահ

Եվրախորհրդարանի նախագահ Մարտին Շուլցն արձագանքել է Թուրքիայում ընդդիմադիր Cumhuriyet թերթի դեմ գործողություններին և դրա աշխատակիցների ձերբակալությանը:

Ըստ Demokrathaber-ի՝ Շուլցն այն մասին իր Twitter-յան էջում հայտարարություն է տարածել: Նշելով, որ Cumhuriyet-ը պատահական թերթ չէ, այն Թուրքիայի աշխարհիկ ամենահին թերթն է և հանրապետության կառույցներից մեկը, նա ասել է. «Թերթի խմբագիր Մուրադ Սաբունջուի և մյուս թղթակիցների ձերբակալությունը նշանակում է, որ Թուրքիայում խոսքի ազատության հարցում «կարմիր գիծ»-ը հերթական անգամ հատվել է»:

Նշելով, որ թերթի դեմ գործողությունը քաղաքական ենթատեքստ ունի, Շուլցը կրկնել է Թուրքիայում ռազմական հեղաշրջման փորձից հետո ԵԽ-ի հայտարարությունը թուրք քաղաքացիների «համարձակության» վերաբերյալ: «Սակայն երևում է, որ աշխատանքից ազատելու գործողությունները ավելի շատ քաղաքական մտահոգություններից են բխում, քան իրավական կամ անվտանգության»,-նշել է ԵԽ նախագահը:

Անդրադառնալով նաև Դիարբեքիրի (Տիգրանակերտի) համաքաղաքապետեր Գյուլթեն Քըշանաքի և Ֆըրաթ Անլըյի ձերբակալություններին և երկրում արտակարգ դրությանը՝ Շուլցը հայտարարել է, որ նմանատիպ նախաձեռնությունները ցույց են տալիս, որ Թուրքիայի կառավարությունը կողմ է բևեռացմանը, այլ ոչ` միասնությանը: