Ես էլ եմ գտնում, որ խնդիրը կառավարության մեջ է. Գալուստ Սահակյան

Այսօր ԱԺ հերթական քառօրյա նիստում ԲՀԿ խմբակցության ղեկավար Նաիրա Զոհրաբյանը հիշեցրեց իրենց հեղինակած նախագիծը «Նաիրիտ»-ի վերագործարկման նպատակով մեխանիզմներ մշակելու վերաբերյալ, որը հավանության էր արժանացել կառավարության կողմից, սակայն չէր ընդգրկվել քառօրյայում: Պատգամավորը կարծում է, որ այն չպետք է գլորել քառօրյայից քառօրյա:

ԱԺ նախագահ Գալուստ Սահակյանը նշեց, որ ճիշտ կլինի այդ հարցով խորհրդարանական լսումներ կազմակերպել, հետո նոր  այն ընդգրկել օրակարգում:

Նաիրա Զոհրաբյանն արձագանքեց` ասելով, որ էներգետիկայի նախարարն ինքն է ասել, որ իրենց վերաբերմունքն այդ նախագծին միանշանակ դրական է, բայց, փաստորեն, հետո կառավարությունը փոշմանել է, ուրեմն կառավարության մեջ է խնդիրը:«Կառավարությունը թող հստակ դիրքորոշում հայտնի, կողմ է, դեմ է, թե` ձեռնպահ` այս հարցի հետ կապված: Նախարարն ինձ ասել է, որ կողմ են այդ նախագծին: Հիմա եթե ասել է՝ առանց տեքստը կարդալու, բայց հետո վերապահում ունեն, ուրեմն խնդիրն իրենց մեջ է»,- ասաց պատգամավորը:

Գալուստ Սահակյանն արձագանքեց. «Ես էլ եմ գտնում, որ խնդիրն իրենց մեջ է, բայց իրենց ուղարկած տեղեկությունն այնպիսին է, որ հիմնավորապես չի գնահատում այդ աշխատանքը»: