Պաշտպանության նախարարը միայն քաղաքական գործիչ է. ՀՀԿ-ական պատգամավոր

ԱԺ ՀՀԿ խմբակցության պատգամավոր Սուքիաս Ավետիսյանը Yerkir.am-ի հետ զրույցում, անդրադառնալով Վիգեն Սարգսյանի՝ պաշտպանության նախարարի պաշտոնում նշանակվելուն, նշեց, որ Սարգսյանը պատրաստված մարդ է և կարող է պատվով կատարել իր գործը:  

«Եթե խոսում ենք անձի հատկանիշների մասին, ուրեմն այդտեղ կասկածելու խնդիր չունենք: Եթե խոսում ենք կազմակերպչական աշխատանքների մասին, էլի կասկածելու որևէ բան չկա: Եթե խոսում ենք արտաքին աշխարհի հետ շփումների մասին, այդտեղ ևս խնդիր չկա: Խնդիր չկա նաև պաշտպանության նախարարության բուն գործելակերպի հետ: Նրա իրազեկվածության հետ կապված ևս որևէ խնդիր չունենք, որովհետև Սարգսյանը նախ աշխատել է ՊՆ-ում՝ որպես ռեֆերենտ, նաև նախագահի աշխատակազմի ղեկավար էր և ի պաշտոնե  արդեն  շփվում էր բոլոր կառույցների հետ, և բնական է, որ նա ունի իր որոշակի կարծիքը»,- ասաց Ավետիսյանը՝ հավելելով, որ կա համաշխարհային փորձ, որը ցույց է տալիս՝ պաշտպանական կառույցի ղեկավարները քաղաքացիական անձինք են, նույնիսկ` կանայք, իսկ բուն պաշտպանության հետ կապված խնդիրները համակարգում է շտաբի պետը:

«Պաշտպանության նախարարը միայն քաղաքական գործիչ է, քաղաքակական պաշտոնյա է ու զբաղվում է քաղաքական պաշտոնով:  Զորքերի հետ գործը, պաշտպանության ամրության  հարցը համակարգողը թող լինի շտաբի պետը, ով  կանի նաև իսկական զինվորական գործը»,- ասաց պատգամավորը:

Հարցին, թե ապրիլյան լայնամասշտաբ ռազմական գործողություններից հետո բավական շատ բացեր հայտնաբերվեցին, և դա՞ էր պատճառը, որ պաշտպանության նախարարը փոխվեց, Ավետիսյանը պատասխանեց. «Մենք ցանկացած պարագայում խոսում ենք սխալների շտկման, խնդիրների լուծման մասին և այդ համատեքստում պետք է երկու բան իրար զուգակցենք` անձը և համակարգը: Այնպես չէ, որ միայն ապրիլյան պատերազմը վեր հանեց թերություններ, այդ թերությունները պայմանավորված չէին միայն անձով, կամ միայն համակարգով: Կան նաև  համակարգային խնդիրներ, ու այս երկուսի ճիշտ զուգակցումը  կտա իր արդյունքը: Վիգեն Սարգսյանի նշանակմամբ և համակարգում տեղ գտած որոշակի խնդիրների շտկմամբ կկարողանանք ավելի լավ արդյունքների հասնել»:

Խոսելով  Սեյրան Օհանյանի հետագա գործունեության մասին՝ ՀՀԿ-ական պատգամավորն ընդգծեց. «Կարծում եմ՝ Սեյրան Օհանյանը կունենա որևէ պաշտոն, որովհետև  նա այն  անձնավորությունն է, ով անցել է հերոսական  ճանապարհ և ունի բավարար ներուժ` մեկ այլ տեղում դրսևորվելու»: