Երբ ԼՂՀ-ն դառնա բանակցությունների լիիրավ կողմ, նա էլ կորոշի՝ ինչ փոխզիջման պետք է գնա. Շարմազանով

Մեկ անգամ չէ, որ ԼՂ հակամարտության բանակցային գործընթացի վերաբերյալ ասվել է, որ քաղաքական կամքի պակաս կա բացառապես Ադրբեջանի նախագահի կողմից. լրագրողների հետ զրույցում ասաց ԱԺ փոխնախագահ Էդուարդ Շարմազանովը:

Նրա խոսքով՝ միակողմանի զիջումներ չեն լինելու: «Կարևորը պատճառների վերացումն է, ոչ թե` հետևանքը, իսկ պատճառները այն բանի հետ են կապված, որ Ադրբեջանը չի ցանկանում ճանաչել ԼՂՀ ժողովրդի ինքնորոշման իրավունքը: Ղարաբաղը երբեք չի լինելու Ադրբեջանի կազմում: Իսկ ինչ վերաբերում է տարածքներին, նշենք, որ տարածքներից պետք չէ խոսել, քանի որ մեկ անգամ ես նրանց տարածքների տեղը ցույց եմ տվել՝ Մարտունաշեն, Գետաշեն. եթե օկուպացված տարածք են փնտրում, թող այնտեղ փնտրեն»,- ասաց Շարմազանովը:

Ըստ նրա` երբ ԼՂՀ-ն դառնա բանակցությունների լիիրավ կողմ, այն ժամանակ նրանց իշխանությունը կորոշի, թե ինչ փոխզիջման պետք է գնա, քանի որ Հայաստանը կոնֆլիկտի կողմ չէ: «Սա տարածքային վեճ չէ, սա ինքնորոշման իրավունքի պայքար է: Արցախը պետք է լինի անկախ պետություն, նրա ժողովուրդը պետք է հնարավորություն ունենա իրացնելու իր ինքնորոշման իրավունքը»,- եզրափակեց Շարմազանովը: