Իշխանությունը երկու պատճառով է փոփոխությունների գնում. Արտավազդ Բայաթյան

Մի բան է պարզ` համակարգային փոփոխություններ են պետք մեզ, թե չէ`անձերը փոխելով` ոչ մի արդյունքի չենք հասնի. yerkir.am-ի հետ զրույցում, խոսելով ՀՀ վարչապետի հրաժարականի և նախարարների` հնարավոր փոփոխության մասին, ասաց երգիչ-երգահան Արտավազդ Բայաթյանը:

Նրա կարծիքով` շատ բան չի փոխվի, եթե համակարգային փոփոխություններ չլինեն, քանի որ եթե գալու են մարդիկ, ուղղակի մեկը մյուսին փոխելով, նույն թիմից, նույն աշխատաոճով, որևէ հետաքրքիր բան չի կարելի սպասել: Ըստ Բայաթյանի` Հայաստանում, կարծես, ընդունված բան է դարձել` մեր բոլոր կադրերը գնում են Ռուսաստան, հետո գալիս ու անում այն, ինչ «սովորել» են, ուստի առանձանապես մեծ ակնկալիքներ չպետք է ունենալ սպասվող փոփոխություններից:

«Կարեն Կարապետյանը քաղաքապետ եղած ժամանակ աշխույժ գործողությունների դիմեց, հետո, չգիտես` ինչու, հրաժարական տվեց: Բայց խնդիրն այն է, որ չգիտեմ, թե որպես վարչապետ ինչպիսին կլինի»,- ասաց նա:

Բայաթյանի կարծիքով` այս փոփոխություններն ունեն երկու պատճառ` մեկը հուլիսյան  իրադարձություններն են, իսկ մյուսը` ճգնաժամը: Ըստ նրա` այս երկուսն են իշխանությանը ստիպում փոփոխությունների գնալ: «Եթե գլոբալ ինչ-որ փոփոխություններ չլինեն, մենք փակուղու առաջ ենք կանգնելու»,- ասաց Արտավազդ Բայաթյանը: