Շանթ Հարությունյանի պես իրենց պահում են հուսահատները. Արտավազդ Բայաթյան

Նման կերպ իրենց պահում են հուսահատները. Yerkir.am-ի հետ զրույցում, խոսելով Շանթ Հարությունյանի երեկվա գործողությունների մասին, նշեց երգիչ, երգահան Արտավազդ Բայաթյանը:

Ըստ նրա` Հարությունյանի դեմքի եւ խոսքի մեջ միայն հուսահատություն էր տեսնում:

«Շատ վշտացած էի եւ մեծ ցավ ապրեցի երեկվա իրադարձություններից, անկեղծ ասած` տրամադրությունս ահավոր ընկավ: Երբ մարդը հուսահատ է լինում, դառնում է անկառավարելի, երբեմն ինքն էլ չի հասկանում` ճի՞շտ է անում, թե՞ ոչ, քանի որ կորցնելու ոչինչ չունի, եւ այդ պահին իր բանականությունն իրեն դավաճանում է»,- ասաց Բայաթյանը:

Երգչի կարծիքով` ոստիկաններն իրենց գործն էին անում` հավաքում-տանում էին մարդկանց. ոստիկանները կոչված են կարգուկանոն պահպանել` անկախ նրանից, թե ով է դա իրենց ասում:

«Մեծ թվով մարդիկ կան, որոնք հուսալքված են ու հուսախաբ, մի մասն ի վիճակի է եւ թողնում-գնում է մեր երկրից, իսկ մյուս մասն ի վիճակի չէ գնալ կամ էլ չի կարողանում պոկվել-գնալ: Երբ մարդը հուսալքված է, շատ վտանգավոր է: Երբ մարդը չորս կողմը տեսնում է, որ արդարություն չկա եւ ինքն իր երկրում իրեն պաշտպանված չի զգում, իր ձայնը ոչ ոք չի լսում, այսինքն` ավելորդ է, դառնում է անկառավարելի»,- ասում է Բայաթյանը:

Մի ժամանակ, երբ անընդհատ խոսում էին ահաբեկչության մասին, որոշել է ճշտել, թե ի՞նչ ասել է ահաբեկիչ. «Պարզվեց` դա այն մարդն է, ով կորցրել է հավատն արդարության հանդեպ: Իսկ անհույսը վտանգավոր է դառնում»: