Պետությունն այս պահին չի կարող ոտքի կանգնեցնել «Հայֆիլմը». մշակույթի փոխնախարար

«Հայֆիլմ»-ը պետականացնելուց հետո մշակույթի նախարարությունը հանձն է առել այնտեղ եղած ֆիլմերը թվայնացնելու գործընթացը: Լրագրողների հետ զրույցում ՀՀ մշակույթի փոխնախարար Արթուր Պողոսյանը հայտնեց, որ շուրջ 300 ֆիլմ կա, որոնք պետք է թվայնացնել, և ամեն տարի պետբյուջեի հաշվին կթվայնացվի 7 ֆիլմ:

«Ճիշտ է, սա մի քիչ բարդ ու թանկ գործ է, բայց կարևորն այն է, որ մենք մեր ուզած որակով ենք թվայնացնում ֆիլմերը: Ինչ վերաբերում է «Հայֆիլմի» գործարկմանը, ապա պետք է նշեմ, որ պետությունը հնարավորություն չունի այն վերականգնելու. մեծ ներդրումներ են պետք, պետությունն այս պահին չի կարող ոտքի կանգնեցնել «Հայֆիլմը»: Մենք մեր հերթին փորձում ենք գոնե եղած ժառանգությունը պահպանել»,- ասաց Պողոսյանը:

Նա նշեց նաև, որ 2015-ին 18 ֆիլմ է թվայնացվել: