«Հայֆիլմը» հետաքրքիր չէ որևէ ներդրողի համար. Արմեն Ամիրյան

ԱԺ-ում 2016 թ. բյուջեի կատարողականի քննարկման ժամանակ զեկույցով հանդես եկավ մշակույթի նախարար Արմեն Ամիրյանը:

ԱԺ «Ծառուկյան» խմբակցության պատգամավոր Նաիրա Զոհրաբյանին մտահոգում էր այն հարցը, թե ի՞նչ չափորոշիչներով են գրողներն ընդգրկվում Գրողների միության մեջ, և ինչպես է, օրինակ «Ինչո՞ւ է խրխնջում ձին» պատմվածքը հայտնվել Գրողների միությունում: Զոհրաբյանը նշեց, որ չի հասկանում՝ ինչո՞ւ է պետությունն անվճար տպագրում նման պատմվածքները, այն դեպքում, երբ դրանց 90%-ը ոչ ոք չի գնում, բացի գրողից: Ըստ պատգամավորի՝ երբ ինքը բարձրացրել է հարց, թե պետությունը պետք է տպագրի բացառապես միայն տաղանդավորների գործերը, դժգոհել են, թե ի՞նչ պետք է անեն անապահով ստեղծագործողները: Պատգամավորը հետաքրքվեց` այս փիլիսոփայությունը փոխվելո՞ւ է:

Նախարարը համաձայնեց Զոհրաբյանի հետ, որ խնդիրն իսկապես մտահոգիչ է: «100 տոկոս երկրորդում եմ ձեզ: 2017 թվականին մենք փորձելու ենք մասամբ լուծել խնդիրը, իսկ ահա 2018-ին ամբողջովին խնդիրը լուծելու ենք»,- հայտարարեց Ամիրյանը:

Զոհրաբյանը բարձացրեց նաև «Հայֆիլմի» մասնավորեցման հարցը՝ ընդգծելով, որ այն արդեն երկրորդ անգամ է մասնավորեցվում: Ամիրյանը նշեց, որ այսօր «Հայֆիլմը» որևէ ներդնողի համար հետաքրքիր չէ: «ՀՀ-ում պետք է նկարահանվի գոնե 10 արտասահմանյան ֆիլմ, որ «Հայֆիլմը» հետաքրքիր լինի ներդրողի համար: Այս պայմաններում անհնարին է, որ այն ներդրողի համար հետաքրքիր լինի»,- ասաց նա: