Թուրքիայի քաղաքացիները Հունաստանի իշխանություններից ապաստան են խնդրում

Թուրքիայում հուլիսի 15-ին տեղի ունեցած` ռազմական ճանապարհով պետական հեղաշրջման ձախողումից հետո Հունաստան փախած  մի թուրք ընտանիք  (4 հոգի) և 3 գործարար հունական իշխանություններից խնդրել են  ապաստան տրամադրել իրենց. տեղեկացնում է Ermenihaber-ը:

Ինչպես հաղորդում է թուրքական «Hurriyet» թերթի կայքը, Հունաստանի կառավարության խոսնակը, հաստատելով վերոնշյալ լուրը, նշել է, որ թուրք ընտանիքը հաստատվել է Հունաստանի Ալեքսանդրուպոլիս  քաղաքում, իսկ 3 գործարարներն անցել են Հռոդոս կղզի: Ենթադրվում է, որ ընտանիքը  Հունաստան է մուտք գործել  Մերիչ գետի վրայով` մոտորանավակով: Իսկ թե ինչպե՞ս  են 3 թուրք գործարարներն անցել թուրք-հունական սահմանը, դեռևս ուսումնասիրվում է: Սպասվում է,  որ նշյալ անձանց կառաջադրվի անօրինական ճանապարհով սահմանը հատելու մեղադրանք, և նրանք դատարանի առջև կկանգնեն: