Մի թիմը չի կարող երկու գեներալ ունենալ. օպերայի թատրոնի տնօրենը` գլխավոր դիրիժորի հաստիքը վերականգնելու մասին

Ստացվել է այնպես, որ օպերայի թատրոնի նորանշանակ գեղարվեստական ղեկավարը` Կոնստանտին Օրբելյանը, մասնագիտությամբ նաև դիրիժոր է, ուստի  գլխավոր դիրիժորի հաստիքը վերականգնելու կարիք չկա. այսօր լրագրողների հետ զրույցումկարծիք հայտնեց Ալ. Սպենդիարյանի անվան օպերայի և բալետի ազգային ակադեմիական թատրոնի տնօրեն Անդրանիկ Արզումանյանը: Ըստ նրա` մի թիմը չի կարող երկու գեներալ ունենալ:

«Եթե կա գեղարվեստական ղեկավար, որը նաև դիրիժոր է, պարտադիր չէ, որ գլխավոր դիրիժոր էլ ունենանք: Ստացվեց այնպես, որ երբ լուսահոգի Գեղամ Գրիգորյանը եկավ թատրոն, ասաց Կարեն Դուրգարյանին, որ նա կարող է շարունակել թատրոնում աշխատել, բայց` ոչ գլխավոր դիրիժորի կարգավիճակով: Դուրգարյանը հրաժարվեց, և հիմա թատրոնն աշխատում է մի շարք դիրիժորների հետ, այդ թվում նաև` հրավիրյալ»,- ասաց Արզումանյանը: