Գերմանացիների 74 տոկոսը Բունդեսթագի որոշումը ճիշտ է համարում

Թուրքիան Գերմանիայի համար վստահություն ներշնչող գործընկեր չէ. կարծում է գերմանացիների 91 տոկոսը: Այս տվյալն է գրանցվել ARD հեռուստաընկերության համար Infratest dimap ընկերության անցկացրած հարցման արդյունքում. հայտնում է 
РИА Новости-ն: Ընդ որում` ապրիլին այդ թիվը 12 տոկոսով փոքր է եղել:

Թուրքիան հուսալի գործընկեր է համարում հարցվածների 7 տոկոսը` 10 տոկոսով պակաս, քան ապրիլին:

Անկարայի հանդեպ անվստահությունն է հավանորեն պատճառը, որ, գերմանացիների 89 տոկոսի կարծիքով, Գերմանիան չպիտի զիջումների գնա Թուրքիայի հետ առանց վիզայի ռեժիմի անցնելու հարցում, նույնիսկ` եթե փախստականների հարցով գործարքը խափանվի: 

Գերմանացիների մեծ մասը նաև հավանություն է տվել Բունդեսթագի կողմից Հայոց ցեղասպանության ճանաչմանը. հարցվածների 74 տոկոսը խորհրդարանի որոշումը ճիշտ է համարել: