Նժդեհի արձանը կարող է հանրապետության սիմվոլը դառնալ, իսկ Բաբաջանյանինը… խիստ մի´ դատեք

Շատ խիստ մի´ ընկալեք թե՛ Բաբաջանյանի և թե՛ Նժդեհի արձանները. Yerkir.am-ի հետ զրույցում կարծիք հայտնեց քանդակագործ Լևոն Թոքմաջյանը` խոսելով օրերս բացված` մարշալ Համազասպ Բաբաջանյանի և Գարեգին Նժդեհի արձանների մասին:

Նժդեհի արձանը Թոքմաջյանն ընկալում է որպես խորհուրդ, սիմվոլ, հուշակոթող: «Պետք է այսպես դիտարկել հարցը` Նժդեհի արձանը սիմվոլ է: Իր տեղում լավ դրված է` համաչափ, սիրուն, Հանրապետության փողոցում, և կարող է հանրապետության սիմվոլը դառնա»,- ասաց նա:

Ինչ վերաբերում է Բաբաջանյանի արձանին, ապա, ըստ նրա,  իր համար միայն զարմանալի էր այն, որ մարշալը հիտլերյան բազկաթոռին է նստած: «Ես այդպես չէի անի, ուրիշ տեսակ կանեի, բայց ես չեմ կարող իմ ցանկությունը փաթաթել ուրիշի վզին: Քանդակագործն էլ այդպես է տեսել` ի՞նչ անենք»,- ասաց քանդակագործը:

Թոքմաջյանը Երևանի փողոցներում մեր մեծերից շատերի արձանները կուզեր տեսներ, բայց փոքր-ինչ այլ լուծումներով, եղած արձաններից տարբերվող: «Կուզեի` քանդակների մեջ շարժում լիներ, դինամիկա, կյանք, խորհուրդ: Միայն լուսանկարչական նմանություն չպետք է լինի, դա է, որ սպանում-թողնում է, նմանության պահը շատ է խանգարում քանդակներին: Արձանը, առհասարակ, պետք է ստիպի, որ իր հետ խոսես»,- ասաց մեր զրուցակիցը: