ԱՄՆ-ում ձերբակալված ադրբեջանցի գործարարի մեղադրականում շոշափվել են Էրդողանի և նրա կնոջ անունները

Նոր զարգացումներ են տեղի ունենում ԱՄՆ-ում ձերբակալված` իրանական ծագումով ադրբեջանցի գործարար Ռեզա Զարրաբի դատական գործում:

Ըստ Siyasihaber-ի` Զարրաբի` կոռուպցիոն և «փողերի լվացման» գործով ապացույցներ ներկայացրած ամերիկացի դատախազի կողմից պատրաստված մեղադրականում, բացի թուրք նախարարներից, շոշափվել են նաև Թուրքիայի նախագահ Ռեջեփ Թայիփ Էրդողանի և նրա կնոջ` Էմինե Էրդողանի անունները:

Դատախազը մանրամասն ներկայացրել է նաև, թե Զարրաբը որ ժամանակաշրջանում ինչքան «նվիրատվություն» է արել նախարարներին:

Նշենք, որ Թուրքիայում դեկտեմբերի 17-ի «Մեծ կաշառք» հակակոռուպցիոն գործողության ժամանակ ձերբակալված, այնուհետև ազատ արձակված ադրբեջանցի գործարար Ռեզա Զարրաբը մարտի 19-ին ձերբակալվել է ԱՄՆ-ում: ԱՄՆ արդարադատության նախարարության պաշտոնական կայքէջի տեղեկացմամբ՝ Զարրաբը մեղադրվում է Իրանի դեմ պատժամիջոցները շրջանցելու փորձի, փողերի լվացման, ինչպես նաև բանկային խարդախության մեջ: Ադրբեջանցի գործարարն ու նրա աջակիցները բազմամիլիոնանոց գործարքներ են իրականացրել, որոնց շահառուն եղել են Իրանի կառավարությունը և իրանական մի քանի ընկերություններ: Նրանցից յուրաքանչյուրին սպառնում է մի քանի տասնյակ տարվա ազատազրկում։

Հիշեցնենք, որ Զարրաբի, Էրդողանի ընտանիքի ու Թուրքիայի մի շարք ղեկավարների անունները հայտնվել էին «Մեծ կաշառք» գործողություն ցուցակում: Զարրաբը և ձերբակալվածները կարճ ժամանակ անց ազատ էին արձակվել: