Ոսկեզօծ ատրճանակ, ինքնաթիռ…նոր մանրամասներ`ԱՄՆ-ում ձերբակալված ադրբեջանցի գործարարի գործով

ԱՄՆ Հետաքննությունների դաշնային բյուրոն նոր մանրամասներ է բացահայտել Մայամիում ձերբակալված` իրանական ծագումով ադրբեջանցի գործարար Ռեզա Զարրաբի գործով:

Ըստ Taraf-ի` ամերիկացի դատախազ Փրիթ Բհարարայի կողմից պատրաստված մեղադրական ակտում տեղ են գտել նաև Զարրաբի ոսկեղենի և անթիվ հարստության լուսանկարները: Նշյալ լուսանկարները հայտաբերվել են Զարրաբի հեռախոսում և նրա էլեկտրոնային հասցեում:

Դատական ակտում նշվել է, որ ձերբակալության ընթացքում իրավապահներն առգրավել են Զարրաբի հեռախոսը, որում եղել են նրա ոսկեզօծ ատրճանակի, անձնական ինքնաքիռի, փողերի և ոսկեղենի լուսանկարները:

Հիշեցնենք, որ Թուրքիայում դեկտեմբերի 17-ի «Մեծ կաշառք» հակակոռուպցիոն գործողության ժամանակ ձերբակալված, այնուհետև ազատ արձակված ադրբեջանցի գործարար Ռեզա Զարրաբը մարտի 19-ին ձերբակալվել է ԱՄՆ-ում: ԱՄՆ արդարադատության նախարարության պաշտոնական կայքէջի տեղեկացմամբ՝ Զարրաբը մեղադրվում է Իրանի դեմ պատժամիջոցները շրջանցելու փորձի, փողերի լվացման, ինչպես նաև բանկային խարդախության մեջ: Ադրբեջանցի գործարարն ու նրա աջակիցները բազմամիլիոնանոց գործարքներ են իրականացրել, որոնց շահառուն եղել են Իրանի կառավարությունը և իրանական մի քանի ընկերություններ: Նրանցից յուրաքանչյուրին սպառնում է մի քանի տասնյակ տարվա ազատազրկում։

Հիշեցնենք, որ Զարրաբի, Էրդողանի ընտանիքի ու Թուրքիայի մի շարք ղեկավարների անունները հայտնվել էին «Մեծ կաշառք» գործողություն ցուցակում: Զարրաբը և ձերբակալվածները կարճ ժամանակ անց ազատ էին արձակվել: