Բրյուսելում Ծառուկյանի թեման չի շոշափվել

Հունվարի 8-10-ը Բրյուսելում գտնված հայաստանյան խորհրդարանական պատվիրակության  ՀՀԿ-ական անդամներ Արտակ Զաքարյանը եւ Կորյուն Նահապետյանը այսօր լրագրողների հետ հանդիպման ժամանակ ամփոփեցին այցի արդյունքները:

Ամեն ինչ, ինչպեսեւ սպասվում էր, հրաշալի է անցել: Yerkir.am-ը պատգամավորներից հետաքրքրվեց, թե արդյո՞ք եվրոպացի բարեկամների հետ հանդիպումների ժամանակ քննարկվել է ամիսներ առաջ Բրյուսելում ԲՀԿ նախագահ Գագիկ Ծառուկյանի արած հայտարարությունը, թե «անհնար է երկրում պայքարել կոռուպցիայի դեմ, եթե հիմնական կոռումպացված անձինք են այդ պայքարը ղեկավարում»:

Պարզվում է` եվրոպացիներն այս թեման չեն շոշափել, թեեւ երկրի երկրորդ ուժն  է այդ հայտարարությունն արել: Համենայն դեպս, այդպես շտապեցին հավաստիացնել ՀՀԿ-ական պատգամավորները: «Քանի որ այցը պաշտոնական էր, այլ ոչ թե կուսակցական, քննարկվել են միայն պաշտոնական նշանակության խնդիրներ: ՀՀ օրակարգում եւ որեւէ կուսակցության օրակարգում առկա խնդիրներ քննարկման չեն արժանացել, բնականաբար, անդրադարձ չի եղել նաեւ Ձեր բարձրացրած հարցին»,- հայտարարեց Արտակ Զաքարյանը:

Ի դեպ, մեր հարցին է, թե` ինչո՞ւ անձամբ Հովիկ Աբրահամյանը չամփոփեց նիստի արդյունքները, ինչի մասին մեզ հետ զրույցում ակնարկել էր պատվիրակության մեկ այլ անդամ, ԱԺ ՀՀԿ խմբակցության ղեկավար Գալուստ Սահակյանը, Զաքարյանը պատասխանեց, որ իրենք բոլոր լիազորություններն ունեն` ամփոփելու այցը: