Շփման գծում լարված է եղել. պատգամավորները պատկան մարմինների հետ հանդիպում են պահանջում

ԱԺ հերթական քառօրյայի սկզբում նիստը վարող` ԱԺ նախագահի տեղակալ Էդուարդ Շարմազանովը խոսեց ղարաբաղա-ադրբեջանական շփման գծում այս գիշեր արձանագրված ինտենսիվ հրետակոծության մասին, որի հետևանքով հայկական կողմն ունի երկու զոհ: Նա ցավակցեց զոհերի հարազատներին:

«Երեկ երեկոյան և այսօր առավոտյան լարված է եղել շփման գծում: Ադրբեջանը, նենգորեն խախտելով Մոսկվայում ապրիլի 5-ին ձեռք բերված բանավոր պայմանավորվածությունը կրակի դադարեցման մասին, հրետանու բոլոր միջոցներով հրետակոծել է դիրքերն ու բնակավայրները: Ունենք երկու զոհ: Զրուցել եմ ԼՂՀ ԱԺ ղեկավարի ու ԼՂՀ կառավարության ղեկավարի հետ. ՊԲ-ն լիարժեքորեն տիրապետում է իրավիճակին: Ներկայումս հարաբերական անդորր է»,- հայտնեց Շարմազանովը:

ԱԺ ԲՀԿ խմբակցության պատգամավոր Ստեփան Մարգարյանը վարման կարգով ելույթ ունեցավ` ասելով, որ, դատելով պաշտոնական լուրերից, այս գիշեր հրետակոծությունն ավելի ինտենսիվ է եղել, քան նախորդ օրերին:

«Երեկ ես առաջարկեցի բանակցել վարչապետի հետ և քննարկում կազմակերպել: Լարվածության մեծացումը վկայում է, որ արժե դա անել: Եղե՞լ է քննարկում վարչապետի հետ»,- հարցրեց պատգամավորը:

Շարմազանովը խոստացավ ավելի ուշ պատասխանել այդ հարցին: