Ժիրինովսկին դարձյալ խոսել է հայերի պատմական հողերի վերադարձի մասին

Ռուսաստանի Լիբերալ-դեմոկրատական կուսակցության ղեկավար Վլադիմիր Ժիրինովսկին  Lenta.ru-ին տված հարցազրույցում մեկնաբանել է նաև ներկայումս Թուրքիային պատկանող հայկական պատմական հողերը Հայաստանին վերադարձնելու մասին իր՝ վերջերս արված հայտարարությունը: Նա նշել է, որ դա հնարավոր է, սակայն հայերը պետք է որոշեն:

«Թող հայերը որոշեն։ Ինչպե՞ս են քրդերը պայքարում իրենց պետությունը ստեղծելու համար։ Զենքը ձեռքին։ Այդպես էլ հայերը թող օգտագործեն դիվանագիտական, տնտեսական, քաղաքական կամ ցանկացած այլ միջոցներ։ Ի վերջո, նրանք հավանաբար ստիպված կլինեն զենքով վերադարձնել իրենց հողերը»,- ասել է նա:

Հարցին՝ կարո՞ղ է ՌԴ-ն աջակցել հայերին այդ հարցում, Ժիրինովսկին պատասխանել է. «Իհարկե, կարող ենք և՛ Հայաստանին աջակցել, և՛ քրդերին, և՛ հույներին, և՛ բուլղարացիներին, և՛ սիրիացիներին։ Նրանք բոլորն ատում են Թուրքիային։ Թուրքիան շրջապատված է հակառակորդներով: Թուրքիայի վերջը եկել է... Այն կպառակտվի»,- ասել է նա։