Նախկինում եղած արատավոր երևույթները հնարավոր կլինի կանխել Ընտրական նոր օրենսգրքով. ԲՀԿ

ԲՀԿ խմբակցության քարտուղար Վահե Էնֆիաջյանն այսօր խորհրդարանում լրագրողների հետ խոսեց Ընտրական օրենսգրքի նախագծի մասին: Նշենք, որ ԲՀԿ-ն ևս Վենետիկի հանձնաժողովի ներկայացուցիչների հետ հանդիպում ունեցավ, որից հետո ԲՀԿ-ականն ընդգծեց, որ մի շարք արատավոր երևույթներ, որոնք նախկինում տեղի են ունեցել, ընտրությունների ժամանակ մտահոգության պատճառ են դարձել, ուստի նոր ԸՕ-ի քննարկումը տեղին էր ու կարևոր:

«Մենք գտնում ենք, որ Հայաստանում կա իրական հնարավորություն որակապես այլ Ընտրական օրենսգիրք ունենալու: Նախկինում եղած արատավոր երևույթները հնարավոր կլինի կանխել Ընտրական նոր օրենսգրքով: Մեր փորձագետների կողմից մի շարք հարցեր են առաջ քաշվել, սակայն պետք է նշեմ, որ ժամանակը բավարար չէր` մեր կողմից արձանագրված հարցերը բարձրաձայնելու և սպառիչ պատասխաններ ստանալու համար»,- ասաց Էնֆիաջյանը:

«Հարցեր կային` հասարակական կազմակերպությունների լրատվամիջոցների հետ կապված: Ասեմ, որ հանձնաժողովի ներկայացուցիչները մեզ հետ համակարծիք էին ու ասում էին, որ այստեղ թյուրիմացություն կա: Ցուցակների հրապարակման հետ կապված էլ ենք խոսել, և Վենետիկի հանձնաժողովի ներկայացուցիչների տեսակետները մեզ հետաքրքիր են: Մենք այս պահին ունենք մի մեծ փաթեթ, որի վրա աշխատել են մեր մասնագետներն ու փորձագետները: Պետք է ասեմ, որ մեզ համար ոչինչ ինքնանպատակ չի լինելու, անգամ` ցուցակների հրապարակման հարցում պետք է լինի տրամաբանություն: Այս և մի շարք այլ հարցերի հետ կապված` մեզ հետաքրքիր էին Վենետիկի հանձնաժողովի հիմնավորումները, որովհետև մի կողմից մենք ունենք ՍԴ վճիռ, մյուս կողմից` քաղաքական որոշակի անվստահության դրսևորման միտումներ»,- ընդգծեց պատգամավորը` հավելելով, որ մատների թանաքոտման հետ կապված էլ են խոսել Վենետիկի հանձնաժողովի անդամների հետ:

Էնֆիաջյանը ընդգծեց նաև, որ ամեն հանգամանք ուսումնասիրելուց հետո նոր հնարավոր կլինի էական ու նոր փոփոխություններով Ընտրական օրենսգիրք ունենալ: