Ով ինչպես է մասնակցելու Երեւանի ավագանու ընտրություններին

Արդեն տեղեկացրել ենք, որ մայիսին կայանալիք` Երեւանի ավագանու ընտրություններում ՀՀԿ ցուցակը գլխավորելու է գործող քաղաքապետ Տարոն Մարգարյանը:

Իսկ մյուս քաղաքական ուժերը մասնակցելո՞ւ են ավագանու ընտրություններին, եւ ո՞վ է գլխավորելու նրանց ցուցակները:

ԱԺ ավանդական ճեպազրույցում պատասխանելով Yerkir.am-ի այս հարցին` «Ժառանգություն» խմբակցության ղեկավար Ռուբեն Հակոբյանը նշեց, որ թեեւ սա շատ կարեւոր հարց է, բայց կուսակցությունում այն դեռ չեն քննարկել: «Ժառանգությունը» ավագանու ընտրություններին կմասնակցի, իսկ թե ո՞վ կգլխավորի ցուցակը, պարզ կլինի առաջիկա մեկ-երկու օրերին:

Ավագանու ընտրություններին մասնակցելու է նաեւ ՕԵԿ-ը: Նրանք նույնպես ավագանու ցուցակը կքննարկեն առաջիկա օրերին:

Իսկ ԱԺ ՀՅԴ խմբակցության ղեկավար Արմեն Ռուստամյանը հայտարարեց, որ հարցը ՀՅԴ-ում դեռ չեն քննարկել: Արդեն որոշ տեսակետներ այս հարցի կապակցությամբ, իհարկե, կան, բայց դրանք բացահայտել Ռուստամյանը դեռ չցանկացավ:

«Տեսնենք` այս առաջ քաշված կարեւորագույն հարցերն ինչ են լինում, նոր կխոսենք ավագանու ընտրությունների մասին, մանավանդ, որ ժամկետների մեջ տեղավորվում ենք: Ամեն ինչ կախված է ընթացքի ճիշտ գնահատումից»,- հայտարարեց նա: