Hurriyet-ն անդրադարձել է ՀՀԿ-ՀՅԴ քաղաքական համագործակցությանը

Հայաստանում Դաշնակցությանը 3 նախարարություն է տրվել. գրել է թուրքական Hurriyet-ը՝ անդրադառնալով ՀՀԿ-ՀՅԴ քաղաքական համագործակցությանը:

Նշելով, որ ՀՀ նախագահ Սերժ Սարգսյանի կողմից ՀՅԴ-ն ներառվել է կառավարության կազմում, կայքը ներկայացրել է դաշնակցական նորանշանակ նախարարներին:

«Ստորագրված արձանագրության համաձայն՝ ՀՅԴ կուսակցությունից էկոնոմիկայի նախարար է նշանակվել Արծվիկ Մինասյանը, ԿԳ նախարար՝ Լևոն Մկրտչանն ու տարածքային կառավարման նախարար՝ Դավիթ Լոքյանը»,- հայտնել է կայքը՝ միաժամանակ նշելով, որ այս համագործակցությանը դրական է արձագանքել հայկական սփյուռքը:

«Հայկական սփյուռքում մեծ աջակցություն վայելող Դաշնակցություն կուսակցությունը ընդդիմություն էր դարձել 2009 թվականին հայ-թուրքական արձանագրությունների ստորագրումից հետո: «Ցյուրիխյան արձանագրություններ» անունով հայտնի արձանագրությունները, սակայն, չէին հաստատվել երկու երկրների խորհրդարանների կողմից»,- եզրափակել է կայքը: