Փոխանակ գրեն, որ հայ կանայք «մամա Ռոզա» են դարձել Թուրքիայում... ՕԵԿ պատգամավոր

Այսօր խորհրդարանական ճեպազրույցների ժամանակ լրագրողները ՕԵԿ խմբակցության պատգամավոր Հովհաննես Մարգարյանին հարցրեցին, թե հասարակությունն ինչո՞ւ պետք է վստահ լինել, որ «Հայկական վերածնունդ» դարձած ՕԵԿ-ը հերթական անգամ փաստի առաջ չի կանգնեցնի՝ ՀՀԿ-ի հետ կոալիցիա կազմելով: Լրագրողները հարցրեցին նաև` ճի՞շտ է, որ ռուսաստանաբնակ գործարար Արա Աբրահամյանը պետք է ֆինանսավորի «Հայկական վերածնունդ»-ը:

«Այո, ժողովուրդը հավատում է «Հայկական վերածնունդ»-ին, և նրանք սատարում ու աջակցում են: Մեզ են միացել 150-ից ավելի քաղաքական կազմակերպություններ: Այո, հավատում են մեզ և հավատն արթնացել է մեր հանդեպ»,- ասաց Հովհաննես Մարգարյանը:

Ինչ վերաբերում է Արա Աբրահամյանին, ապա, ՕԵԿ-ական պատգամավորի խոսքով, իրենց ձեռնարկած քաղաքական գործընթացների հետ Արա Աբրահամյանը կապ չունի: Ըստ Մարգարյանի` Արթուր Բաղդասարյանը և Արա Աբրահամյանը լավ ընկերներ են, ընտանիքներով մոտ են, բայց թե ի՞նչ կորոշի Արա Աբրահամյանը, քաղաքական գործունեություն կծավալի՞, թե՞ ոչ, կյանքը ցույց կտա:

Ինչ վերաբերում է ճշտող հարցին, թե ՕԵԿ-ը չի՞ բացառում, որ ՀՀԿ-ի հետ կոալիցիա կկազմի, պատգամավորը նշեց, որ նախ պետք է նայել, թե ընտրություններից հետո որ ուժերը կանցնեն խորհրդարան:

«Ով ինչ ուզում է գրի, մենք պայքարում ենք հաղթելու համար, բայց մեր դեմ գրում են էն մարդիկ, ովքեր իրենց կողքին մի հոգի մարդ չունեն և իրենց բռնած գրիչի բոյին էլ չեն: Մենք պետք է վերականգնենք հույսն ու հավատը մեր ժողովրդի մոտ: Փոխանակ գրեն, որ մեր հայ կանայք «մամա Ռոզա» են դարձել Թուրքիայում և ինչերով են զբաղված, որ հայ մարդը խեղդամահ է անում իր նորածնին, սա խայտառակություն է, բայց դրա մասին չեն գրում, այլ մեր դեմ են գրում»,- զայրացած ասաց Հովհաննես Մարգարյանը: