Ռուբեն Բաբայանը խոստովանեց` կուզեր գրքի հրատարակիչ լինել

Հովհաննես Թումանյանի անվան պետական տիկնիկային թատրոնի տնօրեն, գեղարվեստական ղեկավար Ռուբեն Բաբայանը խոստովանեց` եթե նորից մասնագիտություն կամ աշխատանք ընտրելիս լիներ, կուզեր գրքի հրատարակիչ լինել:

Նա նշեց, որ մարդու կայացման, մտածելակերպի ձևավորման հարցում գրքին ամենակարևոր տեղն է տալիս:

«Արվեստը երկխոսություն է, իսկ գիրքը տասնապատիկ անգամ երկխոսություն է, որովհետև քո երևակայությունն է խաղում, ոչ թե հեղինակինը: Գիրք ընթերցելիս ինքդ դառնում ես հեղինակ: Գիրքը բացում է մարդու մտահորիզոնը, կոտրում բոլոր սահմանները, հնարավորություն է տալիս մշտապես անդրադառնալու ինքդ քեզ, ապացուցում, որ դու մեծ տիեզերք ես»,- ասաց Բաբայանը:

Նա նշեց նաև, որ գրականությունը ոչ միայն արվեստ է, այլ ամեն ինչ, և իզուր չէ, որ առանձնացնում են` ասելով` գրականություն և արվեստ: «Կարդանք` լավ կլինի»,- համոզմունք հայտնեց Բաբայանը: